خواطر أورانجيه

 

مبارح كنت أقرأ موضوع لصديقتي العزيزه ويسبر أثــار في داخلي حقيقة عدة تساؤلات وخلجــات داخليه زمان ما سئلتها لنفسي أو ناقشتها حتى ….ولكن موضوعها طرح في ذهني سؤال : طيب إنتي شو رأيك ؟! غيرتي رأيك ولا لسه تفكيرك كما كان عليه في بداية العشرينات ؟!

ما حبيت أعلق على موضوعها لإنو ردي راح يكون طويل فقلت أطرحه ك بوست أناقش فيه الفكره  واللي هي حسب ما فهمتها :

هل يتزوج الشاب لو كان مو قادر ماديا 100% ؟! وما هو الحد الأدنى لمتطلبات الزواج  اللي لازم يكون مأمنها ؟

!

أولا : الموضوع شائك نوعا ما ومتشعب والإنسان العاقل بشكل عام في أي شيء بحياته مو لازم يصدر أحكام قطعية لأي موضوع كان خاصة المواضيع الإجتماعيه بالذات كل حاله تعامل بشكل خاص يختلف عن الآخر لذلك الأحكام المطلقه بوجهة نظري غلط !!!

ثانيا : أنا مقتنعه إنو المصاري مو هي سبب السعاده الرئيسي والود والتفاهم هو أهم شي والتوافق الإجتماعي والعلمي و و و لكن ما لازم ننكر إنو المصاري هي حل لكثير من الأمور وسبب للسعاده في كثير من الأحيان لكن ما لازم نخليها هي المعيار الأول في اختيارنا لإنو في شغلات تانية كتير أهم !! مشان ما أطلق أحكام عامه بدي أعطي مثاليين لحالتين من خلالهم بتفهموا شو رأيي بالموضوع ……ا

المثال الأول :

لو أخدنا مثال لشاب في مقتبل حياته مثلا وكلنا بنعرف إيش معنى إنو الشب يكون لسى بالعشرينات ؟!! معناته إنو لسى ما حوش إشي يخليه يقدر يطلب بنت الناس ( عم أحكى عن الغالبية العظمى من الشباب ) ولو افترضنا إنو هالشب كان حابب بنت وناوي يخطبها شو يعمل طيب؟!! والبنت بدها إياه كمان !!! آراء الناس راح تنحصر بمحورين :

يا إما  يطلع يسافر يعمل أي إشي يحوش مصاري وبعدين يتجوزها لإنو بنات الناس مو لعبه لازم يكون معاه مصاري

أو

لا يا عمي يجوزوا بأقل التكاليف وهي وهو بشتغلوا والله الرزّاق!!.

هون لازم نحكم عقلنا بالجواب ونشوف الإثنين شو رأيهم بالأول ؟!

المشكله مرات بتكون بالأهل ومتطلباتهم للزواج !! أنا برأيي لو الإتنين بدهم بعض ومتفاهمين وما شا الله عليهم يعني هو لا راح يلاقي زيها وهي مبسوطه فيه وحابيته و ووالشب معاه إشي  متواضع اللي يعينه على حفله بسيطه واستئجار بيت …يتوكلوا على الله ولو بعيشوا باستيديو صغير راح يكونوا سعيدين لإنو الزواج أساسه التفاهم والود والحب وشوي شوي بصيروا !! فهون بعتمد عالبنت والشب والمفروض إنو الأهل ما يكون إلهم دخل  البنت هي اللي بتقرر بدها ولا ما بدها عرس مطنطن و و و !! (المفروض بحكي )بس للأسف بنلاقي مرات كتير اتنين بتأخر زواجهم كتير مشان الأهل حضرتهم يقدروا يعملوا العرس بالفندق الفلاني وو و !! بالمختصر أنا برأيي لو الشب معاه أدنى متطلبات الزواج من القدرة على استئجار شقة وعمل عرس متواضع ومهر متواضع يقول يا الله !! وهي أكيد إيدها على إيدوا لإنو الحياة صارت تشارك وقليل الشباب اللي بقدروا يقوموا بمصارف البيت من راتبهم …ا

العبىء المادي اللي بفرضوه الأهل على العريس صار السبب لتأخر كتير من الزيجات هالأيام ووصار سن الزواج مرتفع لحد ما وصل لل34-35 اللي بكون فيه الشب غالبا قدر حوش مصاريف عرس فاخر ومهر عالي يليق بجناب ومقام الأهل قبل العروس !!! وعلى فكره القرار بعتمد عالبنت كمان في بنات بتقلك يا عمي أنا ما بعيش بأقل من هيك وبدي وبدي …فكله بعتمد عالإتنين زي ما حكيت !!! ولكن بالمجمل أنا أؤيد الزواج ولو بأقل التكاليف المتواضعه لإنو هالأيام مشكلة العنوسه للبنات  وحتى الشباب وتأخر سن الزواج أصبحوا من أخطر المشكلات اللي بتواجه مجتمعنا  وانتشرت على إثرها الفاحشه والزنا فليش ما نأيد الزواج مقابل محاربة هيك مشاكل وآفات اجتماعيه ؟!

المثال الثاني :

شاب ما بشتغل أو يوم بشتغل ويوم لأ وما معاه أدنى متطلبات الزواج ليتجوز …..

أنا برأيي إنو البنت لازم يكون عندها كمان نوع من العقلانية بعيد عن العاطفه !! صحيح حكينا إنو التفاهم والود هما أساس الزواج الناجح بس كمان وجود المادة مهم  زي ما حكيت أدنى المتطلبات عالأقل….ولو واحد حكالك ارمي حالك بالبير بترمي؟ أكيد لأ !! وهون الحاله مبينه وضوح الشمس برأيي إنو الزواج بهيك حاله راح يكمل بالمشاكل وينتهي بالطلاق !! لما تيجي تتطلع من برا على مواصفات الشب بتعرف إنو يا عمي ما بزبط !! أي انسان عاقل بعرف إنو لازم يكون في أدنى متطلبات مادية لتمشي الحياة كمان  !! وهون بقول إنو الحب والتفاهم والود للأسف بدون وجود المادة اللي تقدر تخليك تمشي حياتك ما راح يوصلوك لبر الأمان ولا بطعموا خبز !!! بالملخص في أولوليات ومعايير للإختيار تبدأ بوجود الحب والود والتفاهم والتوافق الإجتماعي و و و وتليها المتطلبات المادية اللي من أقلها تقدر تفتحلك بيت متواضع تكملوا فيه حياتكم سوا سوا ….

About these ads

About orangee

Soo simple girl , always spreading smiles around the world :) soo optimistic about her life ;)

Posted on November 27, 2012, in daily events, my writings :-). Bookmark the permalink. 4 Comments.

  1. انا بحكي عن شخص بنطبق عليه المثال الاول و اللي صار هو ان الشب راح يسافر يشتغل بره ليكون وضعه المادي احسن :)

    المثال الثاني انا برضه ضد هالنوع من الزواج لانه الشب مش جاهز، اقل شي يكون في عد مادي شهري متوفر ليحقق اقل متطلبات الحياه من اجارات و فواتير
    ممكن مستقبلا يترك الشغل لاي ظرف بدها تكمل ﻕمعه بس تبدا الحياه بهالشكل مستحييييل

    شكرا يا صديقتي الغاليه على الاشاره لمدونتي و عالرد المتعمق بالموضوع :)

  2. أهلا ويسبر عزيزتي :-) وأنا هيك كنت مفكره رأيك أكيد^_^ فهمت عليكي :-) العفو عزيزتي ….

  3. السلام عليكم:) انا قرأت الصفحه هدايه وحبيت احكي انه موضوع الزواج فيه كثير اختلاف في الأراء حتى على مستوى العائله وانه في ناس كثير بكون الهم تأثير في الموضوع خاصه الأهل ونظرتهم للطرفين… وانا بأيدك بانه لازم يكون في هناك توافق بين الطرفين وكمان انه المصاري مش اهم عنصر لبناء علاقة زوجيه ثابته.
    وكمان مثل ما قلتي انه لازم يكون في تسهيل من الاهل للأمور وانه ما يخلقوا مشاكل ممكن تأدي لتصعيب الأمور على الشب او البنت وانا بشوف انه مجتمعنا بعاني من هاي المشكله ومن سببها بصعب على كثير من الشباب حتى مجرد التفكير بالموضوع!
    ولو بدنا ننظر للموضوع من ناحيه دينيه الرسول محمد صلى الله عليه وسلم قال يا معشر الشباب من استطاع منكم الباءة فليتزوج .يعني في كثير شباب قادرين على الزواج من مفهوم الحديث ولكن عادات مجتمعنا اليوم بعيده كثير عن الحديث.
    وانتي ماشالله لخصتي الموضوع وانا بأيد كلامك 100% بس بحب اضيف انه المصاري صح مهمه بس الأهم بكثير يكون موجود الموده والمحبه(وجعل بينكم مودة ورحمه..صدق الله العظيم) وانه في عائلات بنسوا أشياء مهمه مثل النسل وتربية الاولاد والإحصان وتقارب الأسر بالإضافه للتوافق العقلي والعاطفي وحسن التعامل اللي بخلي الحب يتنامى مع الايام
    والموده الحقيقيه هي المحبه فاذا نمت بين الزوجين تمت السعاده واكتمل التوافق فالحب يقضي على كل نقص حتى لو كان النقص بالمال! وانا بحكيش انه الشب يكون عالحديده بس اشي ومنه:))
    اما اذا نقص الحب نوعا ما فالرحمه تحفظ الحياه الزوجيه وتكون السبب في بقاء العشره يعني مثلاً الزوجه بكون همها الاولاد او العكس وما ننسى انه كثير مايكون هناك عواطف ومشاعر من طرف واحد فالزوجه تحلم بالسعاده والزوج غالباً يعيش الواقع بهمومه ومشاكله ولو تم التقارب والتنازل من كل منهما فبامكان الزوجين مواجهة اصعب مشاكل الحياه فالزواج عقل وعاطفه… عقل يسير امور الحياه بحكمه وعاطفه تخفف من شدتها فلا يمكن أن يكون عقلاً وحدها او عاطفه وحدها بل الإثنان معاً! فمن الصعب ان تكون العلاقه مبنيه على عاطفه فقط ولا يمكن ان تكون جافه رسميه وأوامر ونواهي ليس فيها عواطف…
    وبالنسبه للانفصال والطلاق ما ننسى الكلمه الطيبه وطريقة التعامل بين الزوجين يعني مرات مع عدم وجود مشكله من ناحيه ماديه بس كثير من المرات واحد من الطرفين ما بكون بعرف شو اللي بغضب او برضي الطرف الثاني وكثرة الغضب لأسباب تافهه وعدم وجود احترام او اهتمام للمشاعر…يعني مره سمعت قصه كان سبب الانفصال كلمه ..في شب مره سمع شب ثاني بحكي لمرته شايفه القمر ما أحلاه؟ فحكتله اه شايفه فراح حكالها انتي اجمل من القمر…فالشب المسكين حاول يحكي لمرته مثل ما سمع صاحبه وكان ليليتها بدر فحكى لمرته شايفه القمر ما أحلاه؟ ردت شو مفكرني عميا طبعاً شايفه!!!! سبحان الله شتان بين الموقفين…يعني شو صار لو انها قالت اه والله انت احلى من القمر! وكانت هاي الكلمه للأسف سبب الانفصال من مده قصيره من الزواج….
    اسف زودتها وطلعت بره الموضوع بس الموضوع كثير مثير وحلو………..سامحينا هدايه سلام

  4. شكــرا سيد أنس عالإضافة الرائعه بالعكس ^_^….وأنا أؤيد كلامك 100% ….يعطيك العافية على التعليق وإثراء الموضوع

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: