Wadi Rum adventure 2


قبل كل شي  البوست عباره عن تفاصيل أكيد إنها اكثر من ممله للبعض ولكني أجد في كثير من الأحيان في مدونتي هذه فرصة جميله لتدوين تفاصيل جميله تمر عليّ قد تكون ذكرى لي مستقبلا ً و  لمن بعدي …

بصراحه آخر مره رحت فيها على معلم سياحي بارز في الأردن كانت البتراء وأنا صغيره ، قررنا نروح أنا وأخواني الإتنين على وادي رم رحله لمدة يومين تخييم ضمن مجموعه طالعه معانا بباص ، كنا حابيين نروح لحالنا بس صعب لأول مره بدها تخطيط إنو تكون معك سياره وعارف الطريق أهم إشي ، فقلنا إن شاء الله المره الجاي ممكن الواحد يطلع مع العيله لحاله فبنجرب هالمره واللي شجعنا إنو حكوا في عائلات طالعه لإنو كنا بصراحه مو متشجعين تجنبا ً لأي عمل ممكن يغضب الله من اختلاط بين الشباب والبنات او أي شيء آخر

….

طلعنا الصبح بكير وانطلق باصين اتنين ، واحد فيه الناس الفايعه اللي كله عندها فري وعادي والباص التاني للعائلات ( على أساس كان في عائلات زي ما كنا مفكرين  كانو كمن عيله بس ) ، قرأنا دعاء السفر أنا والمحروسين الإتنين وودعنا الأهل كونو بالنهايه هادا سفر وما بعرف الواحد إذا برجع ولا لأ  …..

جلسنا في منتصف الباص ، كانت ساعات الرحله طويله تقريبا 6-7 ساعات اتمنيت لو خطر عبالي وجهزت أسئله مسابقات مثلا ً لإنو الباص كان فيه مايكرفون يعني ممكن نعمل جو حماسي ومسابقات مسليه . وإحنا بالطريق حط سواق الباص شريط عن فضائل الصلاة والحث عليها , انبسطنا وقلنا خير إن شا الله جزاه الله خير ، وما قعد 10 دقائق  إلا طلع شب من الكراسي الخلفيه وشوش السواق وطفا السواق الشريط ، لا حول ولا قوة إلا بالله ، ما بدهم إشي إلو علاقة بالدين  !!!!  سبحان الله !!!

يا جماعه الدين يسر وما بحكيلك ما تستمتع بحياتك بالعكس ، عيش حياتك واطلع رحله لكن خلي قدامك جمله واحده اللي هي : رضا الله أولا ً ، هل الله راض ٍ عني بهذا العمل ، كل شىء بالدنيا حلال إلا بعض الأشياء التي حرمها الله ونبهنا إنو نجتنبها …الناس غريبه ماخده فكره عن الدين إنو كل شي حرام وإنو الواحد يا بكون ملتزم بالدين وحابس حاله ومش مستمتع بحياته ومتزمت  يا إما الأمور عنده مفتوحه وعادي ووقتيها بعيش حياته بس …سبحان الله !!!

المهم حمدنا الله إنو ما حطوا عالأقل أغاني وبلشوا يرقصوا أو يزقفوا ربنا يسرها….

كان في مخطط إنو نروح عالعقبه مشان نطلع بيخت بالبحر …كان المخطط إنو الكل إلو ساعتين يعمل فيهم شو ما بدو ، نزلنا الباص بالسوق واتفقنا نتجمع بمكان معين ، اتجهنا أنا وإخواني  لمسجد بالسوق لإنو الوقت كان صلاة الجمعه ، صلينا الظهر والعصر جمع تقصير ، بعد ما خلصنا لفينا شوي بالسوق ….وتجمعنا وانطلقنا لليخت بالباص ….. البحر وما أدراك ما البحر إييييييييه

طلعنا باليخت و أول ما طلعنا هوووووووب شغلوا الستيريو عالعالي وبلشوا يرقصوا الشباب والبنات تزقف غير إنو الشباب صاروا كإنهم هستيريين مجانين وكإنو صار هلأ الرقص مستباح بالبحر فجأة ، زي ما مرة قال الدكتور أمجد قورشه على إنو كيف الناس مرات بتنجن !!!  مثلا ً لما اتثلج بالجامعات ثلج وتصير تندف فجأة هووووب بتلاقي البنات والشباب بصيروا يلعبوا مع بعض ويرموا طابات ثلج بعرفوا بعض ولا ما بعرفوا هيك بنجنوا فجاة وبصير كل شي عندهم مستباح ،البنت اللي كانت مبارح ما تحكي مع شب دفعتها وتتضحوك معاه اليوم لإنها ثلجت صار عادي يرموا على بعض طابات ويضحكوا سبحان الله ولا حول ولا قوة إلا بالله !!!! يعني الواحد طالع يستمتع بمنظر البحر وأصوات الأمواج ولا يرقص ؟!!!! كان ارقصوا عالأرض لكان .

وهروبا ً من هالعلقه نزلنا عالطابق الأول باليخت وما كان غيرنا فيه لإنو الكل فوق بيرقص  ، كان في درجتين بآخر اليخت مفتوحه عالبحر مباشره ما في حاجز ، كتيييييييير المنظر كان حلو بجنن وصوت الأمواج يــا الله شو حلوه هييك منظر برد الروح🙂

عدنا لوادي رم بوقت الغروب كان تقريبا ً ، وتوزعنــا ، منا من طلع من نصيبه خيمه ومنا من طلع من نصيبه غرفه وإحنا طلعلنا غرفه وفيها مروحه كمان ، الحمد لله ، مع إنو كنت حابه خيمه بس يومها كانت الجمعه اللي سجلت أعلى درجات حراره بالمملكه ،صلينا و تعشينا…

بينما انطلق كل الجروب اللي معنا لساحة بالمخيم عاملينها للسهرات والرقص والعياذ بالله قررنا  احنا إنو نتسلق جبل عالي كتيير كتيير بأول الجبل صاحب  المخيم عامل له  شوية درجات للطلعه وبعدين إذا بدك تعلّي أكتر بدك تطلع عالصخر وبتعرفوا جبال رم كيف ؟!! شوي شوي طلعنا على ضو الموبايل وأنا ما جننت إخواني إلا شوي على دير بالك تتزحلق ، شوي شوي مشان الله ، إمسك منيح يا خوي …هههه من كتر ما شفت بهالمستشفى شوفات الله وكيلك صرت أخاف …وصلنا لمكان عالي كتير كتير ، كنت جايبة معاي علب فول وعلب ذرا ( على أساس نحس إنو بتخييم قال ، تقشف يعني هههه) قعدنا وانبسطنا بالمنظر المطل وما في داعي يعني أذكر إنو طلعلي فـــار وصيحت صيحه الله أعلم فيها ( بلاش فضايح ) :-)))

طبعا ً سميت بدنهم بنص القعده على إنو هلأ  احكولي كيف بدنا ننزل ويا دوبنا طلعنا  بس على ضو الموبايل ؟! والله لا يوطرزلكم على هالطلعه هههههه سهرنا عالجبل وكملنا السهره بالليل عالرمل فرشنا ولعبنا اونو :)، قبل ما إنّام شفنا إنو في دراجات  بالمخيم

buggies

تحمسنا للموضوع كتيير واتفقنا مع المرشد  إنو تاني يوم على الساعه 6 قبل شروق الشمس نطلع إحنا الأربعه بالسيارات مشان نشوف شروق الشمس من الصحرا …

وفعلا ً نمنا بكير عال12 …قمنا صلينا الفجر جماعه ورحنا عالمرشد . لبسنا طواقي الحمايه للراس واتعلمنا كيف نسوقها مزبوط …طلعنا من المخيم وإحنا بنزمر تقول كإنها فارده …ههههه

أخدنا مكان بنص الصحرا ، الجو كان حلو لساته فيه براد شوي ، حفرلنا المرشد حفره ولعنا نار من العشب اليابس وحطينا الشاي عالنار بانتظار شروق الشمس ، ما شاء الله منظر لا ينسى حقيقة ً ، تخيل وادي رم وكإنه قطعه من سطح القمر .

وقعت الكاميرا عالرمل وبطلت تشتغل سبحان الله !! قعدما شي ربع ساعه نحاول أبدا فيش مجال كبست معها ، وبدأت علامات اليأس والحزن بادية على الإخوان زنجو ورينجو ( وانا كمان من جوا زعلت ليش الكذب ) بس تلطيف للجو صرخــت فيهم : إحنا إجينا نستمتع وننبسط مو نتصور وبعدين الذكرى بالقلب جوا يلا يلا انطلقوا

have fun guys :-))

وصلنا على سيق بالجبل كتيير حلو وهناك اتذكرنا فجاة إنو معنا آي فون للتصوير …أخدنا صور وكملنا طريقنا ، مرينا بكهف يقال إنو للورنس العرب والله أعلم ، توقفنا هناك ولأول مره في حياتي بسمع صوت الصدى بين الجبال لما تنادي بصوت عالي وتسمع أربع ارتدادات للصوت بين كل الجبال ، عزفلنا المرشد على الشبابه تاعته معزوفات شعبية ، انبسطنا كتيير وقعدنا نحكي بمواضيع عده …

ركبنا السيارات وانطلقنا لخيمه كبيره بنص الصحرا هي عباره عن بازار، البدو بهديك المنطقه فاتحينه ، كنت حابه أشتري برقع بدوي:-)) بس على حظي كان خالص ، كان ببيع ولد أمور عمره شي 7 سنين اسمه متعب اتصورت معاه بالبازار ودردشنا معاه شوي 🙂

رحنا بعدين على هضبه من الرمل  ، بتيجي عليها من بعيد وبتنط وإنت راكب بالدراجه من عليها وبترتفع بالهوا عــــــــالي رهيـــبه والله كانت :))) بآخر نطه اتفقنا انا وأخوي إنو نبعد كتير لورا مشان نيجيها أسرع وبالتالي أعـــلى بالهوا ، أحلى ، طبعا ً أنا بلشت بالأول وحماسي راح ما يوديني بستين داهية ههههه ،  لما نطيت بالهوا عالي وبدل ما ألف وأرجع ضليت على نفس السرعه دغري لقدام وما انتبهت إنو في نزله حادة ومو انسيابية أبدا🙂 شفتلك إياها من هون واتشهدت طبعا ً وبوووووووووف إجيت عليها من ارتفاع الأرض العالية غز على الأرض اللي تحت خبط تقريبا بزاوية حاده …طبعا إيدي التنتين طقوا من الرسغ ورقبتي من ورا طقت كمان وضليت مكمله دغري بالدراجه ما وقفت  ….هلا أخوي لإنو كان مهدي السرعه فضربته عادي خفيفه ما صار شي …..إجى علي المرشد قلي شو صار فيكي شي ؟؟!! قلتله : لا لا ما في شي عادي يلا كملوا ….

يا حبيبي على هالخبطه😦 ، ساقوا هما قدامي وأنا ورا على أساس ما فيي شي لما سألوني  ، وأنا بسوق الدراجه طقيت إيدي وحركتهم لرجعوا تلحلحوا شوي ، رقبتي كانت بساعيتها ما في أي وجع عادي بس وقت الخبطه وجعت .

بس عنجد كانت طلعة الدراجات إشي خيالي وفيه سحر خاص ، عنجد مناظر بتجنن ما راح انساها بحياتي ….لا أخفيكم إنو تاني يوم رقبتي ما كنت بقدر أحركها نهـــــائيا ً وشحطه كنت راح أفوت المستشفى :))) بس مشي الحال على مساجات وكريمات خفّت وكل شي راح ، على ما يبدو إنها شد عضلي كان الله ستر لإنو كسر الرقبه أصعب شي وخطير …

بشوا طلعت من هالرحله  ؟؟

– في بلدنا الحبيب مناطق لازم الواحد يزورها لا تفوت أبدا ً.

– توبه أعيدها إلا برحــله عائليه خاصة .

– خفّوا يا حكومه على هالشعب حرام والله أسعار الدخول للاماكن السياحيه نـــار وخاصه اللي عنده عيله والله ما بقدر عليها …أصلا لو عملوا إحصائيه غير يطلع نص الشعب بعمره ما زار البترا ، أي الدخوليه لحالها عشرين ليره واللي عنده ست سبع نفار شو بدو يعمل ؟!!

– المره الجاي نتحرى مخيم جيد لا تقام فيه معاصي قدر المستطاع

مشان نرّزق واحد بستاهل هذا إذا لم ننوي التخييم بخيمه فردية بعيد عن أي مخيم  وهو الأفضل🙂


About orangee

Soo simple girl , always spreading smiles around the world :) soo optimistic about her life ;)

Posted on August 30, 2010, in kashkol. Bookmark the permalink. 6 Comments.

  1. عجبتني التفاصيل 🙂

    أنا عمري ما رحت لا وادي رم و لا البتراء و لا العقبة
    !!!!!!!

    “آه أردني و الله أنا”

    أبعد شي الكرك وصلت
    “عالجامعة” و بسسسسسسسسسسسسسسسسسسس
    جد بوست حلو

    شوقتيني أروح

    هـ <=== إحم

  2. ثانك يو فري فري متش مستر هيثم 
    بتعرف ما بستغرب إنو ما رحت لا أنا ولا إنت على أماكن سياحية مشهوره عنا لإشي واحد بس —> إنو المواطن الأردني لا تسوق له الأماكن الأثرية بشكل جيد إعلاميا ً ، يعني إعلامنا والله مقصرين بالتعريف والدعاية وما حدا بعرف عن المناطق المخفية الخلابه عنا عدا عن إنو الأسعار كمان غير تشجيعية بالمره ….
    الله بعين بنروح على سوريا ولا على جزر تركيا مع دالاس عالأقل أرخصلنا وكل يوم بالراديو بنسمع دعايات والله ….هههه
    مو غلط فكر إذا إجيت عالأردن إطلع رحله مع العيله ما راح تخسر وحلو لو كان في ناس بتعرف الطريق أحسن وأحسن….:-)
    اللـــه يعينك هو كنت تروح عالجامعه بالكرك أوووووووف والله مسافه ….أكيد ذبحت مناسف لما اتخرجت ههههه

  3. ana marka l yarmouk🙂
    went there 4 a visit only.

    We were discussing this today 3a fekra; how the promotional efforts r 0 + the high irrational prices.

    yalla ,, lamma tseery wazeeret seya7a o ana l ameen l 3am benzabbe6 l wade3 o ben5ally Irbid a7la madeeneh siya7eyyeah😀

    H.

  4. Ohhhhh el YarmoOouk😀 akeed bte3raf lakan irbed o gaw-ha el 7elo 🙂
    sho wazeret seya77a 2eee ….FashaR X(

  5. ! ma la77agna noktob ,, lool
    2ah ,, anni know Irbid o yemkin a7san minnik!😉

    6.5 years; best time of my life evEr! Eveeeeeer😀

    H.

  6. hehehe an Ga3dah( mo 2a3dah ) el yoom🙂
    lah lah lah ma bzon ….wain el 6.5 odam 25 sanna😉
    6ayeb walahe good 2eno 3agbatak …shenoo fee NAS ma 3agbat-ha o ma 7abat-ha ma3 2eno kol ahel 3amman bs yego 2enna be2oloo neyalkom 3a irbed😀
    irbed mafee men-ha😉

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: