بكفى لقلقه

لقلقه أو لجلجه بالأردني بتعنى كتر الحكي  وجيبة سيرة الناس على الفاضي والمليان….

والله العظيم في ناس تخصص  الله وكيلك قبل ما تسلم عليكي وتقول السلام عليكم بتحكيلك آه شو في أخبار ؟

مشان الله بكفي يا جماعه خزقتو أذنينا وخرمتو راسنا ….

الحق عاللي بسمع …أصلاتن لازم الواحد يوقفهم عند حدهم أول ما يبلشوا يحكوا ويحكيلهم رجاءا إذا الحكي فيه جيبة سيرة فلان وعلان بديش أسمع وبلا غيبة ونميمة  بكون أحسن …. لإنو السمع نحاسب عليه كمان..

واحد طّلق مرته ببلش فيها بين العالم والناس كانت وكانت وبأدق التفاصيل ما بين المره وجوزها ….واحد فسخ خطبته ببلش بين الناس يبين الأسباب علنا ً …

يا حبيبي مو ضروري الكل يعرف ليش فسختو  ، خلص ما صار نصيب  ومو ضروري تشهّر  بسمعة  البنات هيك علنا وكمان البنت مو ضروري تفضح الشب وتخلي اللي ما يشتري يتفرج وعلى ودنك يا تاجر ، أما إذا إجى ناس خص نص سألوك ( أو سألوكي والكلام موجه للبنت كمان ) بدهم يخطبوا  نفس البنت وكان في عيب  بالعيله مثلاً إحكيلهم بينك وبينهم من باب الأمانه  اللي حثنا عليه الرسول عليه الصلاة والسلام فقط لا أكثر ولا  أقل وبكمن كلمه تفهم ضمنيا ً مو ضروري تفاصيل وروايات ومغامرات  صارت مع هالعيله ….

انـــا شفت وسمعت طلاقات بين الناس بس زي طلاق وحده بتقربلنا ما شفت …ما اتفقوا ببساطه ، هو إلو ستايل معين بالحياة وهي كمان بختلف عن  ستايله هو ، هو ما قدر يصير زيها ولا هي قدرت تصير زيو ….راحوا عالمحكمه بعد 3 سنين زواج  (من بعد إصلاح ومحاولات أكيد)  طلقهم القاضي وسلموا على بعض وحكتله :  إن شا الله الله بوفقك  وبتلاقي بنت الحلال اللي تناسبك وهو حكالها وإنت كمان الله يوفقك ويسعدك ….يا سلاااام أكتر من هيك رقي ما ضل بالدنيا وما  في حدا سألها أو سألوا ليش انفصلتوا بحكوا والله ما اتفقنا بنمط المعيشه وبس لا أكثر ولا أقل وبمدحوا ببعض غير شكل عادي  ما قعد بين الناس يحكي والله طول نهارها أبصر شو ومره رحنا وصار هيك وهي حكت كيت وكيت وبتعمل وبتساوي  وقعد يشّهر فيها ..وعلى فكره مو ضروري كل اتنين اطلقوا يكون سيئيين بالعكس ممكن الإتنين كتيير مناح بس تحت سقف واحد لا يمكن يعيشوا …

وأكثر بؤرة ومستنقع  للحكي هو الشغل يا لطيف وخاصة لو كان الشغل مكتبي ببلشوا الموظفين ببعض وعلى اشاعات وقال وقيل ويا عيني على قعدات النسوان ولا الصالونات يا لطيـــف…..

للي من هالنوع حاول إنو تبطل / تبطلي  هالعاده لإنو اللي بحكي عالناس بصير معاه نفس الشي وربنا يغلق على قلبه ويصدأ قلبه مع الوقت ..ومن راقب الناس مات هماً ….

واللي ما بحكي ولا بحب الحكي انصح اللي حواليك ما يحكو وادعوا بالموعظه الحسنه و إذا بلشوا يحكو حاول تنهاهم  لإنو إذا ما كان إلك موقف  كإنك إنت بتحكي زيهم فالساكت عن الحق شيطان أخرس …خفف من مجالس القيل والقال تسعد

وكان أنس  روى حديثاً عن النبي –صلى الله عليه وسلم-  قال : “لا يستقيم إيمان العبد حتى يستقيم قلبه، ولا يستقيم قلبه حتى يستقيم لسانه ”

وهنا أوردت مقال جميل منقول عن الدكتور عمر عبد الكافي بهذا الخصوص للفائده …

ما في  حدا منزل أبدا لكن الإنسان بحاول إنو يصير أحسن ويغير من عادة عنده أو عند غيروا  للأفضل  وما بعرف ليش الخط مو قابل يتكبر بهالسطرين خص نص الله وكيلك  كعيت وراهم  مش قابلين يزبطوا ….

About orangee

Soo simple girl , always spreading smiles around the world :) soo optimistic about her life ;)

Posted on October 5, 2010, in religious. Bookmark the permalink. 9 Comments.

  1. كلامك صح 100% وهل يكب الناس في النار على مناخرهم إلا حصائد ألسنتهم!! بس الصراحة تمسكي لسانك أسهل من إنك تمسكي دنيك. الغيبة بتعطينا شعور إنا أفضل من الآخرين وبترضي كبرياءنا وغرورنا. وصدق الذي قال: استدللت على كثرة عيوبك من كثرة ما تعيب على الآخرين.

  2. معك حق فعلا انها لقلقة
    وبالنسبه لحالة الطلاق اللي ذكرتيها
    معقول في زي هيك؟!! هاي معجزه جد

    انا شخصيا في الشغل بكون اتعلمت اكون كثير حذره
    لانو اللقلقه بتوقع ع راس الواحد مرات:)

  3. Rana ,
    يعني هو القابض على دينه كالقابض على الجمر هالأيام 100% صح والله الدنيا صارت كتير صعبه يا رنا فالأعوان على الشر كثر هالأيام والشياطين صارت من الإنس ….ومسك اللسان كمان مو سهل …لما بتيجي تتفرجي على أي تجمع فيه ناس بتلاقي إنو لو ما الغيبة والنميمة موجوده بالدنيا ما حدا قعد مع حدا ( ولسا في ناس بقعدوا ما شاء الله مع بعض بدون غيبة ونمينة آه لسا في ناس هيك بالدنيا )… في أهداف للغيبة سيئة أكيد كإرضاء وإشباع الذات بالمقارنه مع الآخرين والفخر لكن أحيانا قد يكون لذكر قصص الناس عظة للآخرين مثلا لكن أكيد بدون ذكر الإسم والتشهير بهم وما أظن إنو وقتها بحكولها غيبة لإنو إنتي ما ذكرتي ناس محدد بحكيك …
    Mayyasi ,
    نعم لسا في ناس بالدنيا لا تدعي الرقي ولا تتخذ الرقي كمظاهر فقط تنحصر بالمصاري والسيارات ولكنها تعيشها بتعاملها مع الآخرين بالذوق والأخلاق العالية ….
    هوهوووووووو بدك تحكيلي هههههه انا حمد لله ما بحب نقل الحكي ولا جيبت سيرة فلان وعلان وما بحب أصلا الحكي أنا بطبيعتي هادية عموما وإذا بقلك والله بعـــمري ما حكيت على حدا بكون كذابه وستين كذابه ما في حدا ما بحكي لكن الشغله نسبية ، يمكن مرات الواحد بالشغل بعصب من فلان وعلان من تصرفاتهم بالشغل وبفش خلقه لصاحبته بس الواحد بتعلم كتيير بهالحياة وبتعلم إنو سرك خليه بقلبك وفشي خلقك لحالك لإنو الكلام بوصل والناس تتناقل الحكي بطريقة تختلف كليا ً عن اللي انحكى بالأصل …بتعرفي يعني لازم البهارات والفلفل شوي …الله يعدمني إياهم شو لساناتهم طويله …ولا بفكر حدا إنو النسوان متخصصين بهالشي بس لاااااا هالأيام الرجال ( على أساس رجال) لساناتهم أطول ويتناقلوا الحكي \اكتر من النسوان حتى الله وكيلك ….

  4. للاسف مظاهر بتزيد هالايام
    و خصوصا بالشغل الحكومي…اسأليني انا
    قهوه الصباح ما بتحلالهم الا بهالقصص

    انا و صاحباتب كنّا نحاول نذكر بعض قد ما نقدر و الصبح نحكي عن اشياء مفيده و عن اخبار عامه لنفيد و نستفيد و خصوصا لو معلومه دينيه معينه لحتى نبدا نهارنا بشي خير

    و عندي بالمكتب انا و صاحبتي حاطين ورقه كبيره قدام وجهنا
    الله يرانا
    الله يسمعنا
    و كل ما بديت احكي بشوف الكلام بسكت وهي نفس الشي

    موضوع اللي بطلقو هاد للاسف منتشر كتير
    الي قريبه من وقت لانفصلت و لهلأ ما حد بعرف شو صار
    بتحكي ما اتفقناش و بس

  5. و الله الناس مش قادريين يفهمو انو ربنا اعطاهم اذنين اثنتين و فم واحد ، يعني لازم تسمع ضعف ما تحكي بس ما شاء الله عنا الوضع معكوس ، الواحد بحكي عشر اضعاف ما بسمع

    المشكلة مش بس بالشغل ، المشكلة وين ما تجمع اثنين فاكثر ، الصالونات ، الباصات ، المواقف ، حتى صالات الانتظار ،

    أبدعت

  6. الله الناس مش قادريين يفهمو انو ربنا اعطاهم اذنين اثنتين و فم واحد ، يعني لازم تسمع ضعف ما تحكي بس ما شاء الله عنا الوضع معكوس ، الواحد بحكي عشر اضعاف ما بسمع

    المشكلة مش بس بالشغل ، المشكلة وين ما تجمع اثنين فاكثر ، الصالونات ، الباصات ، المواقف ، حتى صالات الانتظار ،

    أبدعت

  7. ويسبـــر ،
    فعلا الصحبه أهم شي وبتأثر على الواحـــد ….والإنسان مهما حكى إنو ما بتأثر إلا بالنهاية يتأثر ولو شيء بسيط ….ثانك يو ويسبر🙂
    وحـــل ،
    حلوه هاي فكرة الأدنين الإثنتين والفم الواحد ما عمري فكرت فيها🙂
    ثانك شو على المرور🙂

  8. لقلقة وهرج وهروب من واقع المجتمع ومن البيت والالتجاء الى اقرب مقهى اراجيل شباب عازبين ومتزوجين وابناء عيل وعشاير مفاشرة ومفاخرة وكله ابو عنتر زمانه ااااااااااه يا همّ لالي يا خريوش

    الحديث زي ما بنقول ببدا بالكذب والجعصة والمفاشرة مبداه
    الكذب ملح الرجال وعيب عاللي بيصدق
    اه اه ولا شو رايكم؟؟؟؟؟؟؟؟؟؟

  9. الكذب ملح الرجال ….:-) أول مره بسمع فيها ….:))))

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: