عندكو تلفزيون ؟

بصراحه اللي خلاني أكتب عن التلفزيون هو إنو بالآونه الأخيره شفت فئات عديده من الناس  ما عندهم تلفزيون بالبيت منهم مين كانت وجهة نظره إنو حرام وللأسف كانت تنتهي النقاشات معهم بشبه طوشه أو خليني أقول حدة بالكلام …ومنهم من كان يقول بإنو إشي غير ضروري بالبيت وخطره أكبر من نفعه !!!!

اللي خلاني أكتب بالموضوع هو إشي واحد يا جماعه اللي هو ليش تركتو كل شي ووقفتو عالتلفزيون؟؟ وين الإنترنت من الموضوع و وين و وين؟؟

هلا اللي بدو يحكي إنو التلفزيون حرام بدو يكون وصل لدرجة إيمانية كتير عالية ومطبق قبليها كتير أشياء من و من…. أضف إلى ذلك وللأسف بحكيلهم لهدول الفئة إنو فاتكم كتير أشياء مفيده عالتلفزيون وعزلتو حالكم عن العالم كـــله !!! بتذكر وقت الحرب عالعراق سنة 2003 جارتنا ما عندها تلفزيون من مبدأ إنو حرام  ، تخيلوا إنو بعد ما الناس كلها عرفت بالخبر وصارت العراق بدها كمان شوي تتحرر عرفت عن طريقنا بالصدفه !!! بالله عليكم هادا منطق ؟

أنا برأيي إنو لو إجينا نلقي نظرة على التطورات التكنولوجية اللي بنمر فيها وتأثيرها على أطفالنا وعيلتنا فإنو الإنترنت هو أخطر من التلفزيون بمية مره لإنو التحكم بالتلفزيون يتم بصورة شبه كاملة بينما الإنترنت فلا !!!

تعالو نحكي شوي عن الفوائد وطريقة التحكم ….

أولا ليش ما تنشطب كل قنوات الأغاني وأي قناة غير محبذة من أفلام و و و ، في ملان قنوات وبرامج دينية عنجد روعــه من قناة صفا ، الروضه ، الرحمه ، اقرأ و و و و أي بكفي خطبة الجمعه تسمعها من الشيخ محمد حسّان لحالها بتكفي وبتردلك روحك  والبرامج الدينية التثقيفية عنجد بتوعيك وبتثقفك ، هلأ أكيد مو كل شي بنحكي بالتلفزيون ممكن يكون صحيح مية بالمية بس الإنسان ينتقي ما يمليه عليه قلبه ….ما فكروا اللي بقولو إنو التلفزيون حرام بإنو كل العلماء والشيوخ كمان على هوا وجهة نظرهم  بعملوا حرام لإنهم بتعاملوا مع التلفزيون وببثوا وبفتحوا قنوات دينية ؟!!!  يعني هما أحسن منهم مثلاً؟

وبعدين لو قلنا إنو التلفزيون إلو تأثير سلبي على الأطفال فأنا معكم ممكن يكون إلوا تأثير زيو زي أي مؤثرات خارجية بواجهوها بالحياة  بس بالمقابل إحنا بنقدر نتحكم بشو بشوفو ، عندكم مثلا قنوات مفيده كطيور الجنة ، ناشونال جيوجرافيك  مثلا ….يعني والله مو منطق كمان لما يجي ولد بالمدرسة يحكي لإبني عن التلفزيون ويضل إبني ساكت ومستحي لإنو بعرفش عن شو بحكي ولو عارف فإنو بتمنى يكون عنده واحد ….

أنا برأيي إنو لو الطفل نشىء على حرمان شيء مــا فإنو راح يرجعلوا بقوة وبسوء استخدام لما تتاح إله الفرصة ويكبر على مبدء كل شي ممنوع مرغوب (وزي لما الرجل يراهق على كبر ويعيش أجواء المراهقة وهو كبير لإنو ببساطه ما عاش هاي المرحله ) بينما لو تركنا للطفل مجال إنو يكتشف هادا الشي لحاله مع توجيه مستمر دائما ورقابه من إنو هادا الشي كويس وهادا الشي لأ فإنو راح يكون عنده وازع داخلي ووعي مبني على تجربة وتتكون عنده قناعه إنو هادا الشي مو منيح لإنو جربه بنفسه أما لإني أنا جربته وعرفت إنو مو منيح أضلني أحكيله من هون لبكره إنو مو منيح ما راح يكون عنده قناعه ووازع ومحرك داخلي إلا ليجرب هو نفسه من كيسه ….أنا نشأت في بيت محافظ والحمد لله بس بنفس الوقت ما كان عند الوالد تعصب أبدا  ، كان يشوفنا بنحضر مرات أفلام أجنبية زي كل الناس ، ما كان يمسك التلفزيون ويسكره لأ ، كان يحكيلنا ويوجهنا إنو هادا الشي مو كويس إنو تتعودوا عليه وهيك ويميت القلب  ومع ذلك ما بحكيلكم إنو بطلنا نحضر بوقتها  لأ ضلينا نحضر بس بكل مره وللآن إذا بدي أحضر فيلم بأنبني ضميري وبكون إشي جواتي بقلي هادا الشي مش كويس وتضييع للوقت و و و وكتير مرات بطفي التلفزيون وبغير رأيي  ف مع الوقت خفت الأمور وصار الوازع داخلي والرقيب رقيب ذاتي والحمد لله  ….

بالنهاية التلفزيون إشي كويس نعم وباب على كل العالم …وليش ما تشوفوها وسيلة لمعرفة عدوك ؟؟ مش اللي بدو يعرف عدوه بتعلم لغته ؟ مشان الله خلينا نركز يا جماعه على أشياء أهم من إنو نقعد نحلل ونحرم بتلفزيون …

About orangee

Soo simple girl , always spreading smiles around the world :) soo optimistic about her life ;)

Posted on January 9, 2011, in daily events. Bookmark the permalink. 4 Comments.

  1. Haitham Al-Sheeshany

    شوفي، أنا معاكي بكل الحكي اللي حكيتيه
    بس بالنسبة لإنو التحكم بالتلفاز أكثر من الإنترنت فأنا بشوف إنو بالعكس! و خاصة لما يكون في أطفال صغااار

    بالنسبة لطيور الجنة -كمثال- كثير جدا ً من معارفي بالأول كانوا يشكروا فيها بس الآن نادمين!

    موضوع شائك بصراحة بس إحنا -كمثال فقط أيضا ص لا اكثر- مرتاحون بقرارنا🙂

  2. لما بتحصر القنوات على القنوات الدينية وقنوات الأطفال بتهيئلي إنو إنت تحكمت أكتر من إنو تعمل فلتره للإنترنت !!! بالإنترنت في شات وفي مواقع بتفتحها وبطلعلك فجأة نوافذ دعائية واعلانات جانبية تزينها البنات السوبر موديل …وفي وفي ….هادا رأيي ما بعرف …
    اما بالنسبة لطيور الجنة فانا عارفة شو وجهة نظرك وسمعتها كتيير إنو القناة تعلم الاطفال الرقص والغناء والتغني بالقيم الإسلامية والتمايل ومتى كانت تنشأة الجيل على الرقص والغناء هدف ؟ و و ….هلأ مو كل الناس أئمة وعلماء دين وفقهاء لنحكيلهم هادا الشي ، إنا برأيي إنو يفتح عليها الطفل أفضل من إنو يفتح على قناة ميلودي ويحضر فيديو كليبات هابطه أو أفلام عربية سخيفه ….التدرج مع الناس في الدين مطلوب وشوي شوي ….هلأ أنا بحترم قرارك بعدم وجود تلفزيون وهادا يمكن شي بريحك كتيير من إنو تقضي الوقت كله مع العيله إنت حر وحياتك إنت أدرى فيها وبصراحه ما بخفي عليك إنو بتمنى أنا كمان أكون هيك ليش لأ فبالنهاية كل دقيقة مع العيله هي كنز لا يقدر بثمن ….. بس صعب نيجي نحكي للناس ما تحطوا تلفزيون وهم أصلا مش ملتزمين بأشياء لسا أبسط بالدين بينما بالمقابل بنقدر نوجه اهتماماتهم لإشي مفيد أكتر

  3. مشان هيك ذكرت إنو “رأيي و ينطبق على حالة أسرتي و هو مثال فقط”🙂

    المسألة بالنسبة للتحكم فصدقيني بعد وقت قصير يصبح التلفاز هو المسيطر خاصة في ظل وجود الصغار! يصبح كملاذ للأبوين 🙂
    و هذه النقطة الأساسية في رأينا بالعائلة

    بالنسبة لطيور الجنة أنا كما قلت: أخذت برأي أناس أثق بهم و لكن لا أقدر أن أحكم لأني لم أرها إلا مرة أو مرتين قبل 3 سنوات! 🙂

  4. احترم وجهة نظرك …
    بتعرف لو الشغلة بترباية الأولاد محصورة على التلفزيون كان قلنا بنقيمه وخلصنا شو هالشغله بس هالأيام صارت الترباي كتيير صعبة بالعصر اللي عايشينه أكبر بكتيييير من شغلة تلفزيون وبرامج أطفال ابتداءا من تأثير الأصدقاء والأصحاب على الأطفال وغيرو وغيراته كتيير ….عنجد مسؤولية كبيره جدا والمشكله إنو انت وأنا وهادا وهداك بربي وبتعب بس أحيانا الطفل إذا كان عنده استعداد(والإستعداد بقصد فيه الجينات نعم لإنو صدق إنو الجينات بتلعب دور كبير ) إنو ينحرف بنحرف في اللحظه اللي بكبر فيها وبصير مسؤول عن حاله والدليل على هيك أديش بنشوف عائلات كتيير ما شا الله عنها محترمه و و و وبتلاقي شخص بهالعيلة ما إلو علاقة فيها لا بالأخلاق ولا بالترباية مع إنو الأهل ربو الكل نفس الشي ……مشان هيك الواحد لازم يضل يدعي ربو إنو يكون معهم ويهديهم ويضل فوق راسهم ينصحهم وما يتركهم .
    والسلام عليكم ورحمة الله وبركاته =)

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: