أسباب تـــأخر سن الزواج


تم الإتفاق مؤخـرا في مدونة ويسبر على التدوين الجماعي  لموضوع هذا الشهر ألا وهو أسباب تأخر سن الزواج ….مع أم ضد ….هلأ الأسباب متعددة ومتنوعة لكن بقدر أحصرها بعدة جوانـــب … الجانب الأول ألا وهو :

الجانب الإقتصادي :

كلنا بنعرف إنو الحياة هالأيام اختلفت عن زمان والإشي اللي كان ثانوي زمان صار أساسي هالأيام متل السيارة وغيرو وغيرو بس في بنات مرات بزودوها وبرتفع سقف المتطلبات من المهر ولوازم الجيزه وكإنهم فايتين على بورصة مو شاريين زلمة .

لذلك الشب هالأيام بياخد وقته ليأسس حاله ويقدر يأمن على الأقل الأشياء الأساسية من تكاليف عرس وبيت والذي منه فيا دوب لأول الثلاثين يفكر إنو يرتبط ، هلأ هادا الجانب ( الإقتصادي ) بهم الشب أكتر وهو اللي بأخر بالعادة سن الزواج عنده.

 

الجانب الإجتماعي والثقافي :

ممكن هون نقول إنو الطرفين البنت والشب بأثر عليهم هادا الجانب بتأخر سن الزواج  ، بما إنو التعليم هلأ انتشر وحملة الشهادات على كف مين يشيل ، فبتلاقي الشب لو كان مخلص دكتوراه او حتى ماجستير بدو وحده تكون من مستواه ، بس يمكن الشب مو كتير بتهمه هاي النقطة زي البنت ، لإنو البنت بالعادة لو كان معها مثلا دكتوراه ما بتقبل تاخد واحد أقل من هيك لإنو من المعروف إنو  لو كانت المرأة مكانتها العلمية والإجتماعية أعلى من الرجل بالنهاية لا بد إنو يعمل مشاكل شو ما كانو متفاهمين بس لو العكس بمشي الحال (هادا برأيي الشخصي وهادا الواقع  ولكل قلعده شوا بالتأكيد ) …..هلأ هادا بالنسبة للجانب الثقافي ، أما بالنسبة للجانب الإجتماعي ، الشب والبنت بضلوا يستنوا بمين يكون قد المقام من عيلة غنية وحسب ونسب  و و…..بيجيها البنت عرســـان بتحكيلها أمها :  يمــا انت بتستاهلي أحسن من هيك ، شوفي بنت خالتك مين أخدت  ، وللشب كذلك : يما البنت مو من مستوانا ، كتير بسطـــا الجماعة ، والله يما على شهاداتك بتستاهل أحسن من هيك  نفسي افرح فيك  !!!

 إنفتاح الطرفين المطلق  والتطور الإجتماعي :

هادا الجانب أهم جانب لإنه أثره عالمجتمع كبير جدا ، علاقات الصداقة والإنفتاح ما بين الشب والبنت أثرت بشكل كبير بتأخر سن الزواج ، يعني بيجي  الشب على الجامعه وما بخلي بنت من شره إلا وهو صاحبها أو حكى معها أو طلع معها ، هذا الإنفتاح بكوّن عند الشب مو عقده بمعنى العقده لكن بعض الشباب ببطل عندهم ثقة بالبنات بشكل عام وبفكر إنو كل البنات متل اللي عرفوهم لإنو يوم اللي بدو يتجوز بدو وحده ما باس تمها إلا أمها وشريفة وعمرها ما حكت مع شب ، فلما يجي يفكر بلاقي حسب تفكيره إنو كل البنات زي اللي بعرفهم ، ومشان ما نظلم الشباب العكس صحيح بالنسبة للبنات ، هلأ هادا جانب  انعدام الثقة  بين الطرفين بموضوع الإنفتاح ، اما  هناك جانب ثاني للموضوع ألا وهو جانب المقارنات وهو جانب خطير كتير ، هلا كل الشباب بعرفو إنو الوحده مو 24 ساعة بالبيت بتكون على آخر طرز ، هما بعرفو هادا الشي ، لكن عقلهم الباطن ما بعرف ، بصيرو يقارنو بين البنات لما يجو يخطبو وبتشرطو ، بدو شعرها زي دانا وعيونها زي ديمه وخفة دمها زي تماره ، بدون وعي بقارنو وحتى ببطل يعجبهم العجب من كتر ما شافو بنــات ، بمعنى آخر معايير اختيار زوجة المستقبل برتفع سقفها ، وبدل ما يكون بدو وحده جمالها مقبول ويدور على الامور الأهم من أخلاقها وتعليمها و و و  بصير بدو وحده ملكة جمال وبمواصفات خيالية وبالآخر بس ياخد بنت الناس بصير يطلع فيها عيوب ويحكي مع حاله : مو خفيفة دم زي تماره ، يا ريت عيونها حلوين زي فلانه ، يعدمني اياها شعراتها مكنفشين لما صحيت من النوم  ….

رسالة صغيرة   : مش راضي ببنت الناس وشايفها قردة!!! الله يرحم جدي وجدتك إللي ما شافو بعض الإ يوم العرس وعاشو مع بعض ستين سنة وضل  جدك لآخر عمره لما يقعد مع جدتك تحت الدالية  تشوف بعيونه اللمعه بعيون أي حبيبين ….

الفكره بشكل عام إنو الإنفتاح  والإختلاط الزائد مع جنس حوا وتعديه الخط الأحمر  خلى الشب يشوف البنت اللي تقدملها  في منها ألف وحده وأحلى منها  كمان لإنو شايف كتير بحياته والبنت كمان بدها واحد بدي بلدنج وخفيف دم زي محمد و و و  …مشان ما حدا يفهمني غلط هلأ أنا ما بحكي إنو الشب مثلا يضل ماشي وعيونه بالأرض لأ أكيد الناس كلها بتشوف بعض وعادي بس أنا بحكي على علاقات الصداقة والبوي فرند بتوع الأيام هاي وصاحبي وصاحبتي وكوووول وعادي وبابا سامحلي وما يضاف إله من جلسات الأنس والضحك والإنبساط المفتوح وبالتالي بصير كل مباح وكل شي بعيون الشب أو البنت حلو .

 الرهاب الإجتماعي  :

بصير يحكولها ولك بعدك صغيره بكير عالجيزه عيشي حياتك ، والله والله لو رجعت فيي الأيام كان اشتغلت بعد الجامعه وطلعت سيارة وعشت حياتي ولا ادبست بالجيزه وقعدت وانخميت بالأولاد والقرف كله …غير التعب  النفسي اللي بتتعرض إله البنت من سماع قصص الطلاق والعلاقات الفاشله للناس اللي حواليها خصوصا للبنات اللي اتجوزوا من عمرها  وبصير عندها خوف من أي شخص والجيزه بتصير عندها قلق وخوف وشبكه وتقييد حرية فبضل تشتغل بعد الجامعة وبضل بصراع اجتماعي ما بين العزوبيه والجيزة وبتترسخ فكره إنو لزوما زوج المستقبل يطلع زلمة خـــام زي جارنا أبو أحمد اللي كان متل العسل يوم الخطبة وصار زي البصل يوم الجيزه، الرجال كلهم هيك  ، فلازم أزبط حالي بشي سياره ، بيت ، راتب بالبنك مشان ما أصفي بالشارع .

البنت المنفوســه :

كلكم سمعتو بهادا المصطلح ، وللي ما بعرفو هو تعبير للبنت اللي كتيير عليها العين وحلوه و و وبضل امها مثلا تتباهى فيها دايما وسيرتهم الوحيده هي الجيزه ، الله على  اليوم اللي بدي أشوفك فيه بالكوشه   وكتيير بتقدملها ناس  وكتيير ناس بحكوا فيها بس للأســـف ما بتتجوز والناس كلها بتصير تحكي أبصر  ليش وأبصر شو في، مع إنو كتيير ناس مناح وما شا الله بتقدمولها بس ما بترضى بدون مبررات  ….الله أعلم إنو بتكون شي عين ضاربتها من أهلها ، من الناس الله أعلم ،  فبقولو منفوسه وبصيروا بدهم يودوها على شيخ يقرأ عليها .

شلة يوووه نسيت أتجوز :

كيف يعني ؟  هلأ في بعض من  الشباب بتوصل سن الأربعين وبعدين بتذكروا إنهم بدهم يتجوزوا ، هما ما بكونو ناسين بس متناسين ، يعني بكون  صاحب كيف زي ما بقولو ، عاش حياته طلع وفات سافر سفارات خيرات الله ، راح وإجى ، إجى وراح ، فجـــأة على سن معينة وغالبا الأربعين ( بعرفش ليش  :) ) بشوف صحابه عندهم ولاد والكل اتجوز وهو بعده ولا إشي ، فبقرر إنو يتجوز هلأ  وقال يعقل شوي .

أنا مو مع  أو ضد الزواج المبكر او المتأخر بالمطلق ….بآمن بإنو الأحكام لا تكون بالمطلق بل  لكل حاله حكمها لحال . أحيانــا بكون هناك شباب بداية العشرينات ناضجين كفاية وواعين وخرج يتحملوا مسؤولية بيت وزوجة والعكس صحيح فكل حاله حسب ، أحيانا الزواج المبكر قد يكون حل لبعض الشباب ووقاية لهم من الفتن كما قال رسولنا عليه أفضل الصلاة والسلام : ( يا معشر الشباب من استطاع منكم الباءة فليتزوج فإنه أغض للبصر وأحصن للفرج ومن لم يستطع فعليه بالصوم فإنه له وجاء ).

About orangee

Soo simple girl , always spreading smiles around the world :) soo optimistic about her life ;)

Posted on June 1, 2011, in daily events. Bookmark the permalink. 9 Comments.

  1. تحليل جميل أخت اورانجي

    موضوع أن الشهادة قد تكون سبب للتأخر فهي صحيحة تماماً، فقد تكون الشهادة الجامعية العليا اي الماجستير او الدكتوارة سبباً رئيسياً في تاخر الزواج، وخصوصاً للفتيات، والسبب طبعاً أن أغلب الشباب في بلادنا حتى وان لم يظهروا هذا يفضلون أن تكون الفتاة أقل منهم بالمستوى الثقافي بالذات ليحافظ على نظرية التفوق الذكورية الموجودة في ذهنه … حيث يعتبر تفوق الفتاة بأي شكل هو تهديد لسيطرته هو على البيت والأسرة

    بالنسبة للإنفتاح والاختلاط الشديد في العلاقات الاجتماعية فهذه أيضاً نقطة مهمة جداً وعلى الجرح تماماً، وهذه من لعنات التأثر بالمجتمع الغربي والبعد عن الدين، عندما يتعامل الشاب و الفتاة مع الغير بدون حدود وبطريقة مفتوحة جداً، يصبح الشخص لا يقتنع بأي شيء ولا يملأ عينه شيء، وأقصد هنا الفتيات والشباب، كما أنه التركيز على الأمور الشكلية من مظهر ومستوى مادي وغيره، جعل كل شخص ينتظر فرصة أفضل من وجهة نظره

    سوف أتوقف قبل أن يتحول ردي إلى تدوينة🙂
    ولي عودة بإذن الله
    وشكراً لك مرة ثانية على اثارة هذه النقاط الحيوية

  2. انا شايف العكس , معظم الناس بتجوزوا بعض من غير معرفة مسبقة, وبكذبوا على بعض طول فترة الخطبة ولما يتجوزا بكتشفوا عيوب بعض وبتبلش المشاكل. انا لغيت الموضوع من راسي من القصص الي صارت حولي. وبما انكم بطالبوا بمساواه و البنت بتشتغل زي الشب وشريك معه في الاسرة المفروض يتساعدوا بالامور المادية خصوصا بالزمن الصعب.

  3. بتعرفي كمان في سبب انا بشوفو مهم
    انو بالرغم من انو احنا مسلمين بس الزواج عنا نصراني
    الطلاق حل مش مستحب بتاتا وعشان هيك بتصير فرصه تصليح الخطأ اصعب
    بيني وبينك اشي بيخوف!

  4. تحليل رائع

  5. nice post sis🙂

  6. سراج …شكرا جزيلا🙂
    ربطك للسيطرة الذكورية والشعور بالتهديد إذا ما كانت المرأة متفوقة أو أعلى علميا من الرجل صحيحة جدا مية المية وواقعية ….هاي من صفات الرجل الشرقي
    وقد يكون الإنفتاح والعولمة أثروا كتير على هالشي الصبايا بدهم زي مهند والشباب متل نور غير الأغاني والفيديو كليبات الهابطة اللي خلت الجيل الصغير يقيم شريكة حياته على الشكل فقط ….انت اسأل أي واحد شو أول شرط إلك بعروسة المستقبل ؟ إذا كان جوابه الأول إنو تكون حلوة وشعرها و و و اعرف إنو هالشب تافه ومو ناضج !!!
    هلأ الواحد بهتم بالشكل ما قلت لأ بس مو أول شرط يكون ، لأ وبالتفصيل بدو البنت كمان !!!

    أودن ، طول بالك يا راجل مش كده ^_^ البنات مو كلهم زي بعض🙂
    اسمحلي بس …من غير معرفة مسبقة مش صحيحه هاي !!! أغلب الجيزات هالأيام بكونو بعرفو بعض بالتفصيل قبل ما يدق الباب حتى ، بس أنا عارفه عن شو بتحكي ….بتحكي عن مجتمع أهل القرى اللي ما بخلو البنت تقعد مع الخطيب وتتعرف عليه من منطلق العادات لا منطلق الدين للأسف لإنو الدين أصلا ما مانع إنو يقعدو ويحكو بدون خلوه اكيد !!!
    هلأ لا تبني حياتك من قصص ناس صارت حواليك بلاش تتعقد بعدين ^_^ الحياة لسا قدامك وبكرا بتيجيك بنت بتشبكك كلهم بحكو هيك بالأول عادي 🙂 على فكره أنا لا أؤمن بالمساواة ولكن أؤمن بالعدل بين الرجل والمرأة لإنهم بعمرهم ما راح يتساوا وبالنسبة للمصاريف شو بالنسبة للرجال قوامون على النساء ؟؟! ولا لما نيجي اناقشكم بشي تاني غير المصاري بتنطوا بتحكولنا الرجال قوامون على النساء !!!! انا برأيي الرجل هو المسؤول عن فتح البيت وما في مانع إنو المراة تشاركه المصروف أكيد ولكن بدون ما تصير هي المدير المالي للأسرة ويضيع دور الأب وهيبته قدام ولاده كالممول الرئيسي لعيلته ….أن بقول تساعد وتصرف والمرأة عمرها ما بخلت على عيلتها وبيتها بس ما تشعر بلحظة إنو هي مجبره على هادا الشي وبالغصب !!!

  7. مياسي ,
    انت قصدك إنو الناس بتجنبوا الطلاق ….نعم صحيح
    والله بخوف كتير وصاير الحال زي البطيخه الصيفي يا عسل يا بصل ^_^
    صالح …شكرا جزيلا إلك ^_^ شرفتنا

  8. رائعة بنت العم 🙂 عندك موهبة رائدة بالوصف

  9. loool sami🙂 thank you very much :”)

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: