التربية الإيمانية

تبدأ من الصغـــر ، والأهم من هذا هو القدوة الحسنــه من قبل الأهل .

لمــا يجي يرد الإبن على التلفون ونقله احكيلهم مش هون!!

وقتها لما  يطلع الجيل كذاب بنلومهم وبنقول والله الاولاد ما بطلعوا زي بعض وإحنا أول ناس بنكذب قدام ولادنا !!! لأ لا تلوموهم …..

لما ما ننهر ابنـّـا لما يرمي وسخ من شباك السياره ، كيف بدنا اياه يطلع مخلص ومنتمي بعمله إذا احنا ما ربيناه بالأصل على الإخلاص والإنتماء لوطنه بالأول اللي لحم كتافه من خيره!!! كيف بدنــا ننشأ جيل اسلامي معتز بعربيته واسلامه إذا احنا ما ربيناهم من الصغر على الدين والاسلام وكنا قدوة حسنه إلهم . لمـــا جيل اليوم يقضي يومه على محطات الفيديو كليبات والمسلسلات التركية وبعديه بنلومه على وقاحته والعجايب اللي بتصير و و !!! ما لازم نلوم البنت لما الأم بتطلع من بيتها على آخر طرز وبدها بنتها تتستر شوي بلبسها أو تتحجب كيف هاي بدها تزبط ما بعرف؟؟

البيت الإسلامي قائم أولا على أم وأب يطبقوا ويكونو قدوه لولادهم …

ليش ما نعلم ولادنا على أخلاقيات الإسلام؟!! ليش ما يكون هناك ضبط وربط بالبيت ؟!! التلفزيون مشطوب منه كل هالقنوات المسخره وحتى لو اطلعوا من ورانا بتصحح غلطهم بالعظه والموعظه الدائمه ونحرك عنده الضمير إنو الله شايفك مشان لما يكبر يتكون عنده وازع داخلي وهو الأهم مو نربيهم إنو يخافو منا ونكون إلهم زي البعبع بالصياح والتفديد لأ ، بدك تتوقع إنو ابنك أكيد بأول فتره شبابه أو مراهقته بدو يعمل شي غلط بس بتراقب وبتنبه وبضل تنصح ولو اضطر معاك الأمر بتكون حازم وصارم ….بس للأسف آباء اليومين هدول مش فاضيين لحالهم ليكونو فاضيين لولادهم !!!والآباء بدهم ترباي !!!

العائله المسلمة بحق وحقيق تطبق الإسلام بكل جوانبه ، وقت الصلاة الأم بتاخد بناته الصغار وبصلوا جماعه والأب كذلك ، حياتهم ومواعيدهم تنظم حسب أوقات الصلاة ، بنصلي المغرب وبنطلع المشوار ، بس نصلي العصر بنلتقي في المكان الفلاني ، الأم والأب ماشيين على خط واحد وقت الصلاة الكل بذكر الكل بإنو يقوم يصلي .

الأب بنصح ابنه إنو انت مثلا بلغت هلأ ما بجوز إنك تسلم بالإيد على غير محارمك وكذلك الأم بالنسبه للبنات .

أخوي الصغير مثلا من جيل الشباب اللي ببداية المراهقه ولسا بعز المرحلة الصعبه اللي بمرقوا فيها الشباب ، فمره راح مع صحابه على صالون وعمل تسريحه بشعراته جل و واكس يعني بالعربي زي شعرات الطنط صار🙂 لما إجى عالبيت فكر إنو راح نقله يااااي شو حلوه بس الكل بصراحه أجمع إنو مو حلوه لإنه صار شكلك زي البنات وأصلاتن الإنسان المسلم مو مفروض يقلد الغرب وهاد تقليد إلهم يا ابني ويا اخوي ،سألناه سؤال : إنت هلأ هل لو رحت عالمسجد بتوقف بهالشعرات جنب الإمام مثلا ؟؟ جاوب : لأ ما بوقف ، قلناله : هـــا شايف إنو انت من داخلك حاسس إنو هادا مو شكل انسان مسلم !!! فمن يومها حلق شعراته حلقه عادية واقتنع مع إنو لساته بحط شوية واكس على طرف شعراته من قدام بس إنو أهون من الأول وإن شا الله فتره مراهقه وبعديها بسلام ، بس الفكره إنو لازم الإبن أو البنت يضلهم يتذكروا إنو الإنسان المسلم يطبق السنه بكل نواحي حياته ويضل في توجيه مستمر من الأهل لإنو صدقوني يوم اللي يجي يعمل الغلط بفكر ميت مره وبحسب حساب إنو في رب شايفه إذا تأسسوا الولد والبنت منيح ما بنخاف عليهم …. لو البنت بتحضر مسلسل تركي وما أدراك ما هي المسلسلات التركيه وسمومها التي تبث في جيل اليوم ، تنبها الأم إنو تقلب القناة وما تحضر مو تقعد معاها واتابع !!!

للأسف إحنــا صرنا بزمن صعب يا جماعه والناس ناسية تماما إنو علامات الساعه الصغرى ظهرت وبلشنا في الكبرى !!! الله يا رب يهدي الجميع ، الإنسان مو كامل أبدا ً ، أنــا شخصيا مرات كنت أنزل هون عالمدونه صوت موسيقى أو شي غنية حبيتها لكــن ضميري باستمرار كان يأنبني وبالنهاية بقيمها ولو في فيديو بدي أحطه وفيه منظر هيك ولا هيك صور بنات بتجنبه نهائيا ً مشان ما آخد ذنبه …الله يعفو عنا ويغفر إلنــا يا رب لو أخطأنا بيوم من الأيام … البيت الإسلامي والمؤمن تصدح منه آيات الذكر بصوت طفل صغير اجتمع مع امه وأبوه واخوانه بعد العشاء وقعدوا يقرأوا القرآن ويحكوا قصة أو عبره قبل النوم …أما البيت الشيطاني فهو بيت امسى على أصوات شجار أهله والأغاني السياحه والنياحه والضحك واللهو فنام أهله وتركو شياطينهم تلهو وتلعب … كم من حال وصل لها الكثير تدمي العيـــن وتفطر القلب ….صدق رسول الله صلى الله عليه وسلم حين قال : “طوبى للغربـــاء” .

About orangee

Soo simple girl , always spreading smiles around the world :) soo optimistic about her life ;)

Posted on June 12, 2011, in religious. Bookmark the permalink. 2 Comments.

  1. تدوينة رائعة وفي الصميم
    التربية بالقدوة أفضل أنواع التربية، فأنت بذلك تغرس القيم بشكل عملي في نفوس أبنائك
    إنشاء أسرة إسلامية حقيقية متوازنة مهمة عظيمة وليست هينة خصوصاً في هذا الزمن مع الإنفتاح الشديد
    جزاك الله كل خير يا أورانجي
    الله يكرمنا نقدر نربي أولادنا على حب رسول الله صلى الله عليه وسلم وإتباع سيرته
    ويبعد عنهم الفتن ما ظهر منها وما بطن

  2. شكرا جزيلا إلك ^_^

    فعلا مهمة صعبة جدا في هذه الأيام …التربية أصبحت صعبه جدا😦
    اللهم كن معنــا واهدنا للطريق الصحيح وقربنا إليك أكثر فأكثر

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: