يـــوم في المشـــرحه

 تحديث :  الموضوع القادم ” يــا سايكو ” بس على ما أظن بدها نزله عالبلد  ولا لأ سيد نادر ^_^

 القصة هاي صارت تقريبا قبل سنة ….كنا بأمان الله بالدوام  على الشفت المسائي وإذ بتلفون القسم برنّ ولا  المشرف الليلي بدو وحده من السسترات ذوات القلب القوي إذا في مجال تنزل على المشرحه  هلأ ، كانت الساعه 9 المسا !!!

– يا ساتر شو في ليش إن شا الله ؟؟

– في وحده توفت من الطوابق قبل كمن ساعه ولما قاموا إلها البربيش اللي بتغسل منه غسيل كلى الدكتور مو مخيط مكانه والمريضه بتسبح بالدم ومو قادرين أهلها يحملوها على السياره لإنو كلها وحتى الشراشف معبيه دم …وموظف المشرحه بقدرش يغسلها كونو هلا ما في بليل مغسله امرأة

  – انـــا : طيب وشو دخلنا بالموضوع ؟؟ تروح سسترات الطابق اللي توفت فيه ويعملوا اللازم !!! كمان بدي أصير انا مغسلة أموات على آخر عمري🙂

– السوبر فايزر : مهو وحده من السسترات نزلناها هلأ وبس بدنا  وحده منكم لإنكم بتعرفوا كيف تتعاملوا مع هيك وضع ( أنــا بشتغل بالعناية الحثيثة العامة مشان إذا حدا بفكر شو الخبره يعني ) …هما مو متعودين وخايفين  !!

– أنا : مممم ….ماشي مو مشكله الله بعين بس مشان هالمره  المسكينه (شريره أنا آآآه ^_^  )… خلي السستر  تلاقيني تحت …

هلأ المشرحه عنا احنا مو زي باقي المستشفيات بمكان بعيد ومعتم وأبصر شو ،

عنا المشرحه بالطابق الأرضي والمكان كله مضوي وعادي مو منزوي ، بس لإنو الدنيا بليل أخدت زميلتي معي وواحد من الشباب الطيبه اللي مداومين معي مرافق :)) وصلت للباب ولا السستر مفحمه من البكى وكمان شوي بدها ادوخ ، بقلها خير مالك ؟ بتقلي خايفه أفوت أنا بخاف …قلتلها : ممم ….شوفي يا عزيزتي إنتي توكلي على الله وارجعي على قسمك بصراحه مو ناقصني هلأ ادوخي جوا وبنصير باتنين بدل واحد …خلص هاي صاحبتي معي …فتنــا لجوا وأهل المتوفية كانو بستنوا فينــا وشكرونــا بصراحه على جيتنا ^_^ المنظر ما أظن إنو حلو احكي عنو بس وحده متوفية- الله يرحمها-  وهيك مغسولة بالدم بكل مكان  …لا إله إلا الله محمد رسول الله ….قعدنا شي ربع ساعه لعبل ما مسحنالها وطبعا كنت جايبه العده معي لإنو أكيد موظف المشرحه بدو يعل قلبي لعبل ما يدور على الأشياء ….انتهينــا وطلعنا  من المشرحه بس بتذكر منظر واحد إنو أهل المريضة الرجال اطلعوا فيـــنا هيك نظره  إنو مستغربين كيف فايتين ومو خايفين وهما وجههم زي الليمونه  …بس الواحد يمكن تعود شوي قد ما بمرق عليه مناظر وحوداث ويمكن أهل المتوفى وضعهم بكون غير كونو المتوفي بخصهم والله أعلم .

على سيره أنـــا شريره🙂 مو شريره قوي يعني بس هيك مرات ازا بتعطي واطي للناس بركبوك وبصراحه ما بحب حدا يستوطي حيطي أبدا وباخد حقي بايدي  …أغيرلكم الجو وأنقلكم لنهفة صارت من يومين معي ، كنت مستلمه مريض على آخر الأسبوع وفي عنا دكتور مرات بزودها  وبطلب فحوصات للمريض ما إلها داعي ولو ما انعملت ما إلها لزوم بس مشان يشوف هو شغله بدو إياها إذا عند المريض ولا لأ …فالدكتور هاد عيلته عياش وبنادي عليه كلنا  أبو عياش …فبحكيلي : هداية كتبت لمريضك هداك كمن فحص إذا سمحتي اسحبيلنا اياهم …رحت عالملف أشوف شو وفجأة تغيرت تعابير وجهي وقطبت حواجبي ههههه …قمت سكرت الملف واجيت عليه من بعيد  بنادي عليه  : أبو عياش  ….

رد : آآه ….

أنــا : والله شغلك يا أبو عياش مو عاجبني اليوم ….شكلك عم تلعب بعداد عمرك ….:))) طبعا ما حكيت الجمله هاي غير سمعت الكل فرط من الضحك ونط شب بقوله : يعني لازم يا أبو عياش تجيب البهدله لحالك …تفضل عاد !!! ههههههههه ….طبعا كله مزح بمزح وتغير جو ^_^

About orangee

Soo simple girl , always spreading smiles around the world :) soo optimistic about her life ;)

Posted on June 12, 2011, in Nursing, Uncategorized. Bookmark the permalink. 13 Comments.

  1. شو القصه الغريبه هاي. احنا تبعون الكمبيوتر شغلنا ممل ما في عنا قصص مثيره :)ـ
    الله يكون في عونكم على هالشغل. انا عندي احترام خاص للممرضين والأطباء اللي هدفهم مساعدة الناس.ـ

  2. Haitham Al-Sheeshany

    :)))
    لا “جدعة” يا هداية

    مع إني بقول إنو وجهك قلب برتقالي أول كم دقيقة!😉

    :شرييييييييير:

    لوول

  3. قلبك قوي ما شاء الله عنك….شكلك بتشربي ماونتن ديو

    :))

  4. مساء الخير اورانج …

    يعني سبحان الله كل شيء قابل للتشريج إلا النفس البشرية، معقدة لدرجة خيالية،
    بتذكر اول مرة زرت مدونتك قرأت كتير شغلات فيها، واللي لفت انتباهي انك من عشاق الرومانسية، بالذات انك عاشقة لأحلام مستغانمي، وقرأت انك ممرضة، والتمريض بدو قوة قلب، فاستغربت كيف انك رومانسية وقلبك قوي ماشاء الله عنك، بس هي من اعتقادي انو الشغلة حواجز، يعني اول مرة في المشرحة بتكون صعبة كتير والمرة التانية بتكون اخف والتالتة بتصير عادي، بينكسر الحاجز نهائيا،

    بس هم الشركس بالمجمل قلبهم قوي 🙂

  5. بالأول السبب اللي خلاني أرمي هاد البوست زمااان بخانة الأرشيف وماأنشره هو إني فكرت إنو لو نشرته راح تكرهوني لووول وتقولو إنو قلبها قاسي و و و…بعدين تشجعت بعد ما انطلب إني ارجع انشره مره تانية وحتى لما نشرته برضه تشوقت أشوف ردت الفعل شووو والتعليقات شو ؟
    جـــراد …..وأنا بشكرك كمان ^_^ شو بدها تكون عندكم قصص بالكمبيوتر هيك مشوقه …نقول انتحار كمبيوتر مثلا ؟؟ هههه
    يا الله ….الله بعين ويقوينـــا شكرا إلك كتير على التعليق اللطيف🙂

    هيـــثم …..يا شرير منك لله بس !!!

    نيســان ….بشكرك على كلمة قوي وعدم استخدام كلمة قاسي🙂 لإنو مع كل ذلك قلبي لسا رهيـــف وحنون جدا🙂
    لا والله بشرب ريد بوووول هههههه :)))))

    نادر يا نادر …^_^
    بتعرف إنو فكرت بالموضوع الغريب هـــاد !!! إنو فعلا جرأة وقوة قلب وبالمقابل زي ما حكيت انت…. غريب فعلا !!! كلامك على فكرة صحيح ممكن الشغلة شغلة حواجز أو تعويد بنقدر نقول أولها صعبة وبعدين بتصير عادي وكمان الشغله ممكن تكون قدرة على الفصل بين الأشياء زي إنك لما تيجي تروح عالبيت بتنسى الدوام والشغل وبترجع للبيت بروحك الأخرى !!!!
    أسعدني تصريحك بشو فكرت أول مره زرت المدونة حقيقة 🙂

  6. Haitham Al-Sheeshany

    يعني ما دعيتي إلا عليّ

    واااااااااااااااع

  7. لــه الله يسامحك ^_^ ما بطلعلي أصلاتن ولســـاني ما بقدر إلا يدعيلك بكل شي فيه خير …بس هاي حركشه مش أكتر 😉

  8. اورانج …

    يسلمو كتير، عنجد بستنى بفارغ الصبر موضوع السايكو، وعلى فكرة انا بكرة موضوعي ان شاء الله عن (واحد سايكو) هو ادراج قديم بس ان شاء يرجع يعجبهم، معناتو الاسبوع الجاي اسبوع (السايكوهات)
    بس بدها نزلة على البلد🙂

    هيثم هادي الدعوة ( من فوق الجوزة) من فوق جوزة الحلق يعني مش من القلب، يعني زي دعاء الام على ولدها، خلص حبيبي لا تعيط هلاء بشتريلك سنيكرز

  9. Haitham Al-Sheeshany

    بدي مارز + باونطي أنا 😦

  10. كان أحد أحلامي عندما كنت صغيرة بالعمر أن أكون ممرضة ، لكنه كان مجرد حلم مستحيل التطبيق لأني ببساطة أنا أخاف بعض الشيء من منظر الدم والجروح المفتوحة ، بل لأكون أكثر تحديدا أشعر بالقرف والغثيان من منظر الدم ، حتى الطعام أنا شبه نباتية ولا أقرب أبدا اللحوم الحمراء 🙂
    لهذا فهي قوة قلب فعلا ( وليست قسوة) من يتعامل مع الجسد الإنساني بآلامه وجروحه ، وهذا من حسن حظ من يمتلك تلك القدرة ، وهذا لا يعني أنهم غير رومانسيين أو لا يشعرون بالمشاعر الفياضة ، بالعكس تماما ، فقد لاحظت ان اكثر الناس حبا بالقراءة ومنها قراءة الأدب هم الأكثر تعاملا وقربا من الإنسان ، لهذا نسمع عن كثير من الأطباء مثلا أنهم شعراء أو أنهم يجيدون العزف على آلة موسيقية أكثر من مهن أخرى يتعامل أصحابها مع مادة جامدة أو مجردة
    تحياتي

  11. نادر …أنا بشكرك إنو طلعتني من هالورطه لإنو العلقه مع هيثم يعني مش قليلة …يعني أقلها شي 30 تعليق عالموضوع وهيتس من الناس عالموضوع شي 100 …..:))) يعني بنصير فرجه وفضيحه بجلاجل ههههههه
    :S
    صار لازم أقرأ الموضوع لكان أكيد نزل هلأ طيارااااااااااااااااااه ……..:-)

    ماجده ….ههههه كمان انتي كان نفسك :))) كتير ناس بحكولي نفس الشي ^_^
    بصراحه في ناس نعم عندهم رهـــاب الدم وهاي القصص !!! بالعكس يمكن انتي عارفه حالك وإنو ما بتقدري تتحملي هاي الأمور فكان قرارك صائب ….
    ما عمري فكرت بالموضوع من هاي الزاوية اللي حكيتي عنها !!!
    هل لإنو نحن بنتعامل مع الإنسان ومشاعره بنكون أقرب للرومنسية والإحساس المرهق خلينا نقول ؟!! ممكن ….فيها وجهة نظر مقنعه جدا ….وأنا أؤيدك تماما إنو الأيام لا تقسي القلب بتاتا وهذا ما نحاول أن نثبته للناس إنو نحن قلبنا مو قاسي ^_^
    بشكرك على المشاركه الرائعه دوما وصدق قلبك وصراحتك المطلقة بتعليفاتك دوما🙂

  12. Haitham Al-Sheeshany

    حدا جاب سيرتي هووووووووووون!

    *checking*

    ok good
    ما حدا
    😛

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: