أن تكــوني ممرضــه

أنـــا شخصيا والحمد لله عندي القدرة بأن أفصــل بين العمــل والحياه اليومــية ، يعني لما بروح عالبيت بنسى الدوام كــله ولـــكن الإشــي الوحيــد اللي ما بقــدر عليه إني أنسى بعض المرضى لما برّوح  !!!برجع بطمّن عليهم وشو صار معهم وهيــك !!! مو الكــل بس الحالات اللي بتترك فيّ أنا شخصياً  أثر كإن يكون المريض إله قصة حزينه ،مقطوع من شجره إو صاير معاه حادث مؤسف وغريب فحتى لو عطّلت بضلني بس أقعد لحالي يخطر على بالي المريض و بالأخص  لو حطيت راسي على المخده بالليل ، وأحيانا بصير معي تخاطر أفكــار أو شي كيميــاء غريبه إنو بهاي اللحظه صار شي وفعلا بكون المريض تعب أو توفى وصارت معي أكتر من مره !!! هلأ الشغــله مو إنو مزعجه ومـأثره عليّ لأ ، بس إنو كتير مرات بحكولي بالدوام أي إحـــنا ما بنصدق على الله نروح وكمان بدنا نفكر بالمريض !!! ليش لأ طيب ؟؟ اعتبره يا أخي بخصك !!! ولا تنسى إنو انت 12 ساعه بعيادة المريض والملائكه تحفك وتستغفرلك زي ما حكى ربنـــا …..حلو تكون هاي المشاعر الإنسانية لسى موجوده بيناتنا بس أكيد ما لازم تأثر على الإنسان بحيث إنو تعيقه عن أداء عمله والحمدلله هادا الشي ما بأثــّر علي أبدا محسوبتكم قلــبي جامد قوي🙂 …..

فأن تكون ممرضـــاً أو ممرضــه يعني :

♥  أنك قد تعرف الخفايــا الطبية أكثر والإجراءات الطيبة المتبعه في الحالات المختلفه مما يعتــبر نعمة ونقمة في نفس الوقت وبتوصل معاك مرات بتحكي يا ريتني ما بعرف شي بها الطب !!! وضليتني على نياتي قاعد ما بعرف شي .

♥ أن تكون دكتور العيله والجيران والحاره وبنادوك على كــل شي بالله الولــد تعبــان …بالله يا خالتي ادقيني إبره …يا خالتي شو آخد ؟ بالله يا خالتي إذا بطلع بإيدك تجيبيلي دوا الضغط هاد دبريها يعني ، يا خالتــي أنا ما بجيب شي من المستشفى هيك أنا شخصيا لو بدي شي بجيب من الصيدلية حتى دوا على التأمين ما بصرف بتكاسل أصرف وبجيب من الصيدلية جنب بيتنــا وبعدين كيف ادبرها ؟ يعني ألطــش ؟ هاد حرام وسرقة يا خالتي !!!!

♥ ان تكوني ممرضــه يعني أن يستــعان فيكي في كل شيء ، ادبري دخول على السريع لفلان وعلان عالعيادات ، تجيب موعد بكير للعياده الفلانية لجارتك أم محمد ، تجيب تقرير طبي لإبن جارك أبو عطــا مشان ابنو عطّل عن المدرسه ودخل عندكو بالمستشفى  !! تسأل عن فلان جاركو اللي عمل عملية القلب المفتوح وتوصي عليه وأن تبني علاقــات جيده وطيبه مع الكـــل من عامل النظافة لحارس الأمن للدكتور مشانك إلا تعتاز واحد فيهم بيوم من الأيام وهما نفس الشي بزبطوك لإنو إلا يعتازوك🙂

♥ عليكي عزيزتي الممرضه أن تكوني ملمه بكــل التخصصات الطبية ، أن تعرفي الحوامل شو بياخدوا أدوية وشو في أدوية للنفخه للمراجعه للإلتهاب للإسهال وشو ماله الولد الصغير إلو خمستعشر يوم ما بوكل !!!  ومين أحسن دكتور جراحه وصدرية وقلب وأعصاب !!!

♥ أن تكوني ممرضــه يعني إنو ما حدا يسألني الساعه أربعه الفجر شو بتعملي أون لاين ؟؟؟!!! لما أكون صاحيه الساعه 6 المســا لإني رجعت يومها  الساعه 9 الصبح من الدوام!!!

♥ وعزيزتي الممرضــه لا تتفاجئي إذا ناس قالولك  : مالك لونــك مخطوف؟ !!! طبعا لما تكون إنت مداوم على مدار يومين أو ثلاثه كالآتي : من الساعه 7 المسا للساعه 7 الصبح ، غير ساعه قبل الدوام لتجهز حالك وساعه بعد الدوام لتوصل البيت أي فعليا 14 ساعه دوام باليوم بتنام 8,30 الصبح لتقوم على 5-4 المسا لتلحق تسفلك لقمة وتلبس لتلحق الدوام على ال 7 المسا وهكذا على مدار 3 أيام  :-)

♥ أن تدخــل سلك التمريض يعني أن تعرف شو معنــى  المصيبه  في الحياة !!! وكل مشاكل الدنيا بتصير بعينك بارده  وما إلها هالوزن ولا طعم لإنك بتدرك إنو من بعد الصحــه ما في كنز بالحياه وهي السعاده الحقيقية ..

♥ أن تكوني ممرضــه يعني أن تكوني مصدر للعطــاء والحنــان والحب والإبتســامه والتفائــل دائما ، أن تكوني قادره على الإبتســامه  في قمة ألــم وحــزن الآخريــن …

♥ أن تسمعــي عشــرات المــرات من كتير من البنــات أو النسوان  : يـــا الله شو كان نفســي أطــلع ممرضــه !!! ويطــرح التسائل الغريب ببالك عزيزتي : إذا كانو كتير بحبو التمريض ليش ما دخلوه ؟؟ أكيد الجواب لإنو نظرة المجتمع خاصه زمان  لهاي المهنة نظره للأسف  كانت متدنية وكانو قليل اللي بفوتوها ، ولو إنو ما زالت النظره هاي موجوده عند البعض لكن الوضع تحســن شوي عن أول …طبعا نظره متخلفة وغبيـــه للأســـف !!!!

♥ ان تكوني ممرضــه يعني أن تتعرضــي أحيانا لبعض المواقف الغريبه كأن يبادرك  أحدهم  إو إحداهنّ بالقول  : رواتبكــم ممتــازه والله !!! وخـــاصه لو كــان هناك عريـــس بالأرجــاء فأول مواصفات العروس هي : ممــــرضه ( عشـــان الراتـــب طبعاُ هههههههههه )

♥ في كل مكــان يتواجــد فيه اجتماع مــا كوني على يقين بأنه  سيرمقكي عزيزتي الممرضــه إحدى الأطفـــال بنظره الخـــوف والترقـــب والتأهب وذلك لمــا أمه بتقــوله : بس يــا ولــد !!! هـــي هاي  شايفــها؟؟ ممرضـــه هلأ بحكيلها تجيب الإبره هــا….O_o

About orangee

Soo simple girl , always spreading smiles around the world :) soo optimistic about her life ;)

Posted on July 17, 2011, in Nursing. Bookmark the permalink. 12 Comments.

  1. لووووووووووووووووووووووووووووووووووووووول

    شو هالروقان ع هالصبح هااااااااااااد
    لوووووووووووووول

  2. ههههههههههههههه الله يبسطك أكتر وأكتر يا أحلى أم عمر بالدنيـــا :)))))))))))

  3. بديش اكتب اشي اكثر من هيك لانه ااحنا بالهوا سوا , بس يمكن انت بتختلفو عنا انكم بتقضو وقت اكثر مع المريض و بالتالي الله يعينكم
    انا مستحيل اكون ممرض لاني راح اكون جلف ! بتحملش علي الطالعة و النازلة المريض يقعد يناديني !!

  4. اذا انا كنت اشتغل مبرمجه بوزارة الصحه اجاني طلبات اعطي ابر…. و اخد مواعيد…وتدخيل مستشفيات….وجيب دوا🙂
    فاااااااااااااااا ما بالك انت و وحل؟؟؟
    طبيعي جدا اللي بصير معكم🙂

    اللي حكيتلها اني ما بعرف اعطي ابر …بتحكيلي و كيف شغلوكي بالوزاره؟؟؟ ويلا واسطهO_o

  5. أعجبني حبك لشغلك و ثقتك بنفسك باللي كاتبيته
    الله يجزيكِ الخير على تعبك مع المرضى و أهم شي يكون الواحد
    عنده حنيه و عطف لعباد الله🙂

  6. انا زمان كان نفسي اصير دكتورة علشان كانت امي الله يرحمها مريضة كثير ” من يوم ما وعيت ع الدنيا وهي مريضة ” علشان هيك كان نفسي اصير دكتورة واعالجها واعالج المرضى لكن للاسف ماصارش نصيب ،
    بس للامانة انا باتمنى الاقي ممرضة تفتح النفس في مستشفيات غزة ، غالبيتهم ” علشان ما اظلمش الجميع ” عندهن عنجهية وكبرة حيل مش طبيعية ومش عارفة مين اللي قال عنهم ملائكة رحمة !! قسوة قلب وغلظة في التعامل مع المرضى وأهلهم .. مابعرف السبب ، بس والله ما هيك لازم تكون مهنة التمريض ، على فكرة انا نصحت ابنة اخي ان تدرس تمريض علشان بلكن تغيرت هالنظرة لهم ..
    سعيدة اني تعرفت ع مدونتك وان شاء الله من المتابعين
    دمت بخير

  7. و الله أنكم/نّ من أنبل المهن على وجه الأرض

    الله يكون بعونكم🙂

    ترون من الأسقام و الأهوال الكثير!

    تشخيصك لل”وضع” جميل و واقعي🙂


    كم رواتبكم صحيح؟😛

  8. وحـــل شو شو ؟؟؟؟؟ كيف ما بتتحمل وانت بالطوارىء خخخ ههههههههه انت المفروض اللي تتحمل🙂
    شفــت بالله !!! مشان هيك أنا بحب الicu لا حدا بنادي عليك ولا شي كلها نايمه ومستغرقه بسبـــات عميــــق🙂
    ويســـبر هههههههههههههه ولا إشي معقول!!!!!!!!!!!!! شو هالعالم هاي ؟ طيب انتي وظيفة بعيده عن المستشفى معقول؟؟؟ أما سمعه !!!!
    الإربدي …..شكرا إلك كتـــير🙂 إن شا الله ربنــا يكون راضي عنـــا جميعا إن شا الله ^_^
    وجــع البنفسج ….أهلا وسهلا فيكي بالأول …شوفي بكل وظيفة بالدنيا بتلاقي الصالح والطالح أكيد بس للأسف مرات ناس بيعطوا وجهة نظر سيئة وبسيئوا للمهنة وحتى تخيلي النظره من بلد لآخر تختلف كمان ….شكرا للمتابعه وأهلا وسهلا دائما فيكي ^_^

  9. هيثـــم….تشكــرات أفندم ^_^
    ليش ؟؟ في عريــس يعني ؟؟!! لووول احـــدفوا عليّ جاي تاقولــك ….ههههه:)))

  10. انا هلا متاكد 100 بلمية انو عندك كروموسومات مستوردة كتير :))))
    حسب ما شفت برى الممرضات الاجنبيات بيدخلوا المهنة عن حب ومش لبعيد شوفي الممرضات في المستشفى الايطالي كانو راهبات وصالوحدة 65سنة ومعظم عملها تطوع ولا حتى بيتزوجواحتى تبقى حياتهم مكرسة للمريض
    هون شي محزن الكل بدو راتب والتهرب من المريض بشي ظاهر لدرجة بعض الممرضات بعطلوا الجرس حتى لا يزعجهم المريض وهم بحفلة لق حكي بالاخص بالليل انا اشتغلت وشفت العجب

  11. سامي بيك … هههههه هلأ تأكدت لكــان🙂
    أي مزودينهــا الراهبــات كمان ههههه اسمهم راهبات وعلى ما أظن لما الوحده تختار انها تصير راهبه ما بتتجوز بغض النظر عن المهنه هيك بعرف ..
    قصص التمريض وسوالفهم كلها بعرفها …في منهم بحكولي مرات هيك شغلات شو كانو يعملوا بهالزمنات هههههههه
    هيثـــم , لوووول عليكO_o

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: