آخــر مستجــداتي على الســاحه

أولا ً والحمد لله تعالــى بعد رمضــان راح ننتقــل للبيت الجديد بدابوق  وراح تنتهـــي مشاوير عمان -اربد واربد -عمان وراح يصيرلنا بيت بدل بيتين🙂 ….وراح أشتاق كتـــير كتــير لإربد بس اتفقــنا إنو ننزل كل فتره نزور النــاس اللي بعزوا علينـــا هون إن شا الله تعالى نتفقد أحوالهم   واللي بدو يشطــح بشوارع اربد يشطــح🙂 أنا تركــت الشغل من أول الشهــر هون وإن شا الله راح أقدم بعد رمضــان على مستشفيــات  معينه أنا حابيتها بعمان إن شا الله خير والدراسه تم تاجيلها للسنه الجاي بإذن الله تعالى وإذا الله راد لظروف معينة وشغلة الرحيل كمان ….بس الحلو بالموضوع إنو غرفة البنـــات إلها برنده صغنونه لحال غير الكبيره ، طبعا حضرتي مش حتقعــد بالغرفة راح اضل قاعده بعدّ نجوم السمـــا خاصه إنوما في شبابيك للجيران تطل عليها ووحي الكتابه للخواطــر راح يزيد حبتــين  ههههه معلش اتحمــلوني ^_^

رمضــان على البـــاب والناس بلشت زي المصاريع الله وكيلك شو هاد ؟؟؟ مش طبيعي ؟ واحد بالمؤسسه ماخد ثلاث جلانات زيت وأبصر شو !!! والله كإنو فايتين على حرب !!!

من يومين قرأت مقال جميل  للأخ جــراد كنوع من التذكير بأشياء كتير ناس نسيوها ونسيوا ليش بنصوم أصلا ً ببدا رمضان وبتبدا معه الموائد من ألف نوع ونوع ويا ريت بيتاكــل أغلبه بنكـــب للأسف …برمضان الواحد بحس حاله إنو راح يوكل كل السفره بس يأذن  بوكل أقل حتى من الأيام العادية !!! في ناس والله مو لاقية اللقمة يا جماعه والصوم بذكرك إنو تحس بهدول الناس وتنكـــسر شوي وتتمرمط بالجوع لتــحس بس لا حياة لمن تنادي للأسف !!! بطــون تصاب بالتخمــه والفجــع حتى صلاة تراويح بتصير تقيله عليهم ….

في عاده حلوه بالبيت متعودين عليها وهي من السنة  النبوية كمان إنو  الرسول عليه الصلاة والسلام كان يفطر على  تمر ويشرب لبن وبالتالي بهيأ معدته على استقبال أي أكل تاني !! حلو الواحد يتعود إنو يفطر على تمر وشوية شوربه يصلي وبعدين يقوم ياكل هيك بعطي فرصة للمعدة وما بياكل فجأة وبصير تلبك معوي وتخمه معه .

خــلونا نتذكر الجار بصحن من طبخــتنا اليوم ….بتمر هندي بشوية قطايف …

بحس إنو  بعمان هادا الشي مو كتير موجود حتى الجار ما بعرف جاره !!! وهاد الشي اللي راح أفتقده كتير هون …

في ناس متعوده إنو ما تاكل أكل بايت للأسف !!! هلأ ممكن برمضان كل الناس بتحب تطبخ أكله بس اللي بزيد بنكب للأسف  بدل ما ينعطى لشي جار جوعان فقير، كان نفسي أعمل مشروع وهو عباره عن شركه متخصصه بجمع الأكل من بعد حفلات الاعراس والمناسبات وبالأخص بالفنادق لإنو الاكل بنكب زي ما هو وما بكون مصيوب ، وتقوم هاي الشركة بتغليف الاكل وتوزيعه على عائلات فقيره محتاجه معروف عنواينهم  بشكل مرتب ومنظم من قبل شباب متطوع …مين بعرف يمكن هادا المشروع يلاقي النور بيوم من الأيام !!! الله أعلم !! بسألوني كتير ليش بتحبي اربد ؟!! وشو فيها غير عن عمان يعني ؟!! بحب اربد للأسباب التالية : كلها سهل لا طلعه ولا نزله …الناس هون لبعضيها أكتر والله لما كنا ننزل على عمان تلاقي الجار صاحب الدكانه قاعد حارس للبيت ولا مخلوق يقرب .. الناس يمكن بسيطه أكتر وعلى البساطه …بدك تشتري أواعي أطفال عندك محل واحد ” بيبـــلوس ” بالسوق بضاعته نــار مرتبه كتير …بدك نقرشـــه بزر بسيطــه روح على محمص القدس أزكى نقرشه وبزر حتى أهل عمان لما يجوا بمروا عليه بشتروا لووول  ممممم شو بدك كمان ؟!! بدك ازكى بوظه هيوا بشارع الثلاثين نسيت اسمه🙂 ….هادا اللي حببني باربد يمكن قلة الأماكن وما بتحتار بالكثره واضل ادور وقلة الضجيج كمان ، بطبيعتي بحب البساطه وما بحب التعقيد …غير جوها وهواياتـّـا ( بتشديد التاء طبعا  هههههه )

من مشاريعي العمّانيه بإذن الله لما نستقــر بالإضافه لشغلي راح أتطــوع بإحدى المراكز لذوي الإحتياجات الخاصه بأيام عطــلي كتير حابه أشوف حالي من هون للسنه الجاي بهاد المجال بحـــبه ولا لأ ، مشان أشوف وين بدي أروح بالماجستير بأي مجال🙂 لساتني محتاره بين اثنيــن ^_^  وإن شاالله كمان راح ألتزم بدروس الدين  وأقوي ديني أكتر وكمان شغله ألا وهــي تراااارااراااااااااا—–> حـــابه أكون زائرة خفيفة الظل لــدار العجزه من فتره للتانية وآخد معي أخوي الصغير وأي أطفال بالعيله نقضي نص نهــار ….

انت تريد وأنا أريد والله يفعل ما يريد …..إن شا الله خير

About orangee

Soo simple girl , always spreading smiles around the world :) soo optimistic about her life ;)

Posted on July 27, 2011, in daily events. Bookmark the permalink. 19 Comments.

  1. يا مبروك يا مبروك…احلى شي البرنده, جد روح البيت بتحسيها

    ان شاء الله بتشوفو على وجهه الخير يا رب

    بالنسبه لزيارة دار العجزه فانا بنصحك فيها لانها جد بتغير اشي فيكي , للاسف ما صحلي فرصه اعيدها 😦

    من الاشياء اللي قاهرتني بالغربه اني بعدت عن كل هالامور, دروس الدين و الايتام و دار العجزه و كان في مشروع خيري ماشيين فيه بس للاسف السفر و قفه

    الله يقويكي على فعل الخير دائما

  2. ما بتتخيلي قديش بفرح لما اقرأ شيء عن اربد كل المدونين من عمان واللي من اربد عايشين بعمان وين المدونين الاربداويين؟؟؟
    شكرا على كلامك الحلو عن اربد. للأسف لو في اهتمام بإربد انا متأكد انه ممكن تكون مدينه زي العالم والناس بس للأسف في الدول العربيه الاهتمام بالعاصمه فقط. ـ
    انا اؤيدك طبعا بالنسبه لهواء اربد الجميل وخصوصا في الليل.ـ
    وشكر خاص لادراج رابط مدونتي في هذا الموضوع :)ـ
    الله ييسرلك الخير في تطبيق مشروعك. حرام جدا انه نرمي اكل وفي ناس محتاجه اله. فكره رائعه.ـ
    وبالنسبه للأعمال التطوعيه الأخرى أغبطك انتي وويسبر على وجود مثل هذا الشعور تجاه الآخرين.ـ
    وبالتوفيق في عملك الجديد

  3. Haitham Al-Sheeshany

    باي باي إربد 🙂

    ألف مبرووووووووووووووووووك

    الله يعينّا على الترحيب برمضان كما يجب

    و عفكرة أنا مخطط للكثير من التطوعيات، إن شاء الله أقدر بس🙂


    أيوا دابوووووووووووووووووووووووووق! مصاااااااااااااارييييييييييييييييييييييي

    لووووووووووووووووووووووووووووووووول

    +
    الموسيقى حلوة، فكرك لو بدون صوت الموج/الماء مش أحلى؟🙂

  4. Haitham Al-Sheeshany

    باي باي إربد 🙂

    ألف مبرووووووووووووووووووك

    الله يعينّا على الترحيب برمضان كما يجب

    و عفكرة أنا مخطط للكثير من التطوعيات، إن شاء الله أقدر بس🙂


    أيوا دابوووووووووووووووووووووووووق! مصاااااااااااااارييييييييييييييييييييييي

    لووووووووووووووووووووووووووووووووول

    +
    الموسيقى حلوة، فكرك لو بدون صوت الموج/الماء مش أحلى؟🙂
    ?

  5. مبروك البيت..وتشوفوا على وجهه الخير يا رب.. والله يوفقك 🙂
    أسعدني كلامك عن إربد أنا بحبها جدا جدا 🙂
    وهاي لجراد:
    فيه مدونة وحدة من إربد ولسه ساكنة بإربد… أنا نسيتني !!؟ .

  6. مبارك البيت الجديد….ان شاء الله تشوفوا على وجهه الخير….ديري بالك برنده غرفة البنات شكلها عاليه شوي وما عليها حديد حمايه!!!! بتخوف شوي

    الله يوفقك وتقدري تعملي كل الخطط اللي ناويه عليها

    رمضان كريم علينا وعليكم
    كل عام وانتي بخير

  7. اربد … ذكريات !!! زمان عنها و الله ، لازمني زيارة

    خلص بح kauh ??
    و بح اخصائي زنخيين !؟ و مقيمين ازنخ و طلاب ازنخ و ازنخ!؟

    بالتوفيق

  8. مرحبا اورانجي
    مبروك البيت الجديد ، وان شاءالله تشوفوا على وجهه الخير والسعد ، دابوق منطقة جميلة جدا ، أحسنتم الإختيار ، والبيت يبدو جميلا ، وأكيد سيزداد جميلا عند تزيينه بالأثاث ( بدنا صورة بعد الأثاث
    (:
    أنا هواي عماني ، لاني ولدت ونشأت وترعرعت ( حلوة ترعرعت) في عمان ، أحبها برغم طلعاتها ونزلاتها ، وبياخة بعض سائقي التكاسي فيها لأنهم يرفضون الذهاب إلى بعض المناطق بحجة الطلعات والنزلات ، مع أنه كل عمان طلعات ونزلات!
    للأسف لا أعرف إربد كثيرا ، ما هي إلا مرور طريق أثناء رحلاتنا ، وهي جميلة بسبب خضرتها ، وهوائها
    رمضان ، على رأي أحدهم أننا نصوم إحدى عشر شهرا ، ونفطر في شهر واحد!!!، أنا شخصيا أشعر بالقهر والغيظ الشديد عندما يطبخ بعض الناس أصنافا عديدة ، ليكب أكثرها في الحاوية فيما بعد ، ثم تراهم يشكون من الغلاء وضيق الحال ، وكل هذه الإسطوانة ، ومع ذلك أحس بالوعي يزداد في هذا الشأن ، على الأقل انا أعرف وضمن نطاق عائلتي ومعارفي ومنذ سنوات أنهم لا يطبخون إلا صنفا رئيسياواحدا فقط ، لكن لا غنى عن التمر هندي والقمر الدين والقطايف ، حلاوتها في رمضان فقط
    (:
    أعاده الله علينا وعليكم جميعا باليمن والبركات
    ووفقك الله لمشاريعك الطيبة ، وبالنهاية هناك قول يعجبني ” إن لله عبادا إذا أرادوا ، أراد”و
    وإن شاءالله تكوني من هؤلاء العباد
    كل عام وانتم بخير

  9. whisper ,
    الله يبارك فيكي يا حبيبتي ويسعدك يا رب ….فعلا البيت بدون برنده زي الصندوق بدون روح🙂
    بتعرفي يمكن زيارتي لديار العجزه مو إنو راح تغير شي فيي بحسها لأ …بتوقع تكون امتداد واستكمال لشغلي اللي كنت فيه لإنو أغلب المرضى كانو عنا عجايز وكل واحد عنده قصه بحياته كنت أقعد كتير أسمعلهم ونسولف أجيب الكرسي ونقعد ساعه ، هيك اضلي صافنه فيهم وبهمومهم ….لساتني بتذكـــر عيونهم اللي حواليها جلد مطعــج كل حسب تعبه وهمومه شو كانت بالحياه ، إيديهم اللي أكل عليها الدهر اللي ربّت وتعبت واشتغــلت وضحّت كتـــير ، بس للأسف مرات كانت تمر حالات ما حدا يسأل فيهم مع إنو عندهم ولاد😦 إإإإإإيــــــــــه حيــــاه الواحد لسى بدو يشوف آآه والله!!!!
    ويسبـــر ، قد تكون الغربه هي السبب لإنك تعودي أقوى مما كنتي وتعرفي فضل اللي كنتي فيه ….لعلـــه خير ^_^ ولا تكرهوا شيئا عسى أن يكون خيرا لكم🙂

  10. jarad ,
    شكرا أولا للتعليق والمرور🙂
    بتعرف يمكن كلامك مزبوط قلائل المدونين الإربداويه ،بس هيها كيكــي قالتلنا إنها من اربد ^_^ وفي مدونة الإربداوي كمان دكتور بدرس برا🙂 يعني الدنيا لسا بخير وإن خليت بليت🙂
    ما بعرف متى شفت انت اربد آخر مره ؟ بس ار بد تغيرت كتير صارت بتشبــه عمان إلى حد ما في جســر على مدخــل اربد وفي مولات كتير زي عمان وتقريبا محلات كتير بعمان إلها فرع هون ، اربد تعتبر ثاني أكبر وأرقة مدينة بعد عمان ^_^
    إن شا الله الله ييســر للجميع بإذن الله تعالى في هذا الشهر الكريم …
    بتعرف كـــل انســـان في داخلــه الخير الكثير بس مرات في ناس كتير بخبــوه جواتهم وما بطلعوه لبرا …والخير فيّ وفي أمتي ليوم الدين كما قال المصطفى عليه صلوات الله والسلام ….

  11. هيثم
    نو باي😦 ما بدي !!!
    الله يبارك فيك يا رب ….الله يا رب ياخد بإيدك لعمــل الخير والدال على الخير كفاعله ^_^
    لووووووووووووووووووووووووول وبس نو كومنت

    صوت الموج أصلاتــن هو اللي كان محليها إه :))))))

  12. كيكي
    الله يبارك فيكي يارب ويسعدك شكرا شكرا
    ^_^
    أنا هلأ عرفت إنك من اربد بتصدقي لوووووووول

  13. نيســان
    شكرا إلك حبيبتي الله يسعدك ….لا تخافي ما تاكلي هم اللي قدامك سعادين الله وكيلك هههه
    وإنت بألف خير وصحة شكرا للمرور والتعليق صديقتي ^_^

  14. وحـــــــــــــــــــــل
    لا تذكـــرني يستـــر عليك أنا لساتني أصلاتن ب denial phase
    والله الأخصائيه إلهم وحشــه والتخويت على المقيمين السنافر كمان راح أشتاق لهالشغلات والطلاب اللي بنظرولك نظره إنو وااااااااااااااو بشتغلوا هدول بحالات خطيره وما بخافوا ….خلي الطابق مستور بس هههههههه كتير ناس جد زعلوا عليّ وزملائي بالأخص قال شو أهدومي أغنية ماجده الرومي : ما حدا بعبي مطرحك بقلبي هههههههههه والله انتي خساره للمستشفى !!!!
    يا الله حياة وبدها تمشي كلنا على هالطريق🙂 لنشــوف عاد أخصائية عمان زنخيين ولا لأ :)))) بس والله راح أفتقد الطلاب كتير ، وإنو اقعد ساعه فهم فيهم إنو اللي بالكتب يختلف عن الواقع يا حبايبي لووووووول

  15. ماجده
    يا أهلا وسهلا بهالطله مجددا ^_^
    الله يبارك فيكي يا رب ويسعدك ويوفقك وينولك اللي ببالك يا رب ….هههههه بالك يعني نطجعها صوره بالأثاث؟؟ لوووووووووول أنا بقول تتفضلي عنا عالبيت بث حي ومباشر بكون أحسن بتشرفينا والله :))))
    بتعرفي اللي بتربى وبعيش طفولته بمكان بحبه شو ما كان …إن شا الله كان بيت زينكو بحبه ….
    بأيدك إنو الوعي زاد نعم …بس يا ريت الوعي يزداد شوي للناس فيما يتعلق بالهجوم على الأسواق ليلة رمضان مش معقول !!!! تقولي كإنو بحرب !!!!

    ” إن لله عبادا إذا أرادوا ، أراد”
    كتير حلو وجميل المعنى ….وإنت بألف خير يا عزيزتي وإن شا الله يكون عليكي شهر المغفره والرحمة والرضوان والعتق من النار إلك ولكل حبايبك آمين يا رب العالمين ^_^

  16. والله موضوع التطوع موضوع جميل جدا, انا تطوعت للعمل بنادي الامير علي للصم بالزمنات, وبعد يومين اكتشفت انو مش راح افيدهم اذا ما بقدر اتواصل معهم بلغتهم, وبالتالي تعلمت لغة الصم وصرت مترجم! لغة جميلة وسهلة وتفتح الباب على التعرف على ناس حولينا بس ما بنقدر نحكي معهم. مع الاسف فقد اللغة لضعف الممارسة بس خبر راح تظل معي طول عمري. بالتوفيق ياجارة

  17. أهلا وسهلا فيك بالأول يا جــار ( على ما يبدو🙂 ) وييين السيد جـــاد ؟؟!! زمااااان من آخر تعليق إلك ^_^ يمكن من ال 2007 !!!
    التطوع شيء جمبل ويغمرك بالعطاء والتضحية دوما 🙂 بنشغل الواحد مرات بمشاغل الحياة بس حلو من فتره للتانية يرجع يتطوع بشي مفيد ^_^

  18. والله زمان عن التدوين والمدونات🙂 بس ان شاء الله في رجعة قريبة, تذكرينا يا جارة بشوية حليفا على لقم

  19. 🙂 أهلا وسهلا
    إن شا الله ليش لأ ….هههههه

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: