رمضانيـــات

ما إله دخل برمضان آآآآه :))))

والله صدقت ويسبــر لما أعطت موجز ملخص عن كل مدون وطلع من نصيب حضرتي : ” , اورانجي اللي بتغيب و بتيجي بتنزل عشرطعش بوست و بترجع تغيب ” لوووووول والله ما كذبتي صايره كسوله آخر فتره  :-)  ^_^ على كلـــن كل عام والجميع بألف خير وصحة وسلامة والحمد لله اللي ربنا أكرمنا برمضـان الحمد لله ، إن شا الله ربنـــا يرحمنا ويغفر إلنا بهذا الشهر الكريم والفضيل  وييســر لكل إنسان باب من أبواب الخير ويفتحها بوجه الجميع آمين يا رب العالمين .

من الرمضانيات اللي راح أفتقدها بإربد هو المسحراتي عنّا بالحاره ، بيجي كل سنة نفسه هيك شب صغير الله يجزيه الخير ، الغريب بالموضوع إنو ظاهرة المسحراتي قلّت كتير على مدى سنين والله العلاّم بعد كمن سنة إذا راح نسمع فيها !!! الإشي اللي بقهر إنو ناس كتير ضد فكره المسحراتي ومرات كتير بشكوا عليه قال شو بعمل إزعاج !!! زي ما صار قبل كمن يوم عنّا واحد طلعلوا من الشباك بصيّح فيه وبحكيله : يا عمي بعدين مع إزعاجك كل يوم ، أنا قاعد سهران مع مرتي وبنحكي وإنت بتزعجنا !!!! طبعا انا ما تفاجأت من كلامه لإنو اللي زي هيك عالم حتى الأذان بكون كتير مزعج بالنسبة إلهم وياما ناس شكوا على مسجدنا بالحارة إنو صوت الأذان بالليل عالي ويا ريت يوطوه !!!! تخيلـــوا !!! لا حول ولا قوة إلا بالله هادا أصلا إذا كان بصلي !! المهم المسحراتي تاعنـــا إسمه ” أجنـــبي ” غريب إسمه لووول أول ما يجي من أول الحارة بتلاقي كل الولاد بطلعوا من البيت وأكيد أخوي الصغير بفوتش هيك شي ببلشــوا بلفوا معه من أول الشارع لآخره ومرات بخليهم يطبلوا معاه ،  غير الناس اللي مرات بطلوا من الشباك مبسوطين وخاصة الأطافيل الصغار بالبيوت🙂  هاي السنة كان فيها أكشـــن شوي ههههه كل ولد بمر من بيته بخلي المسحراتي ينادي على أبوه مثلا : يا أبو خلدون وحّد الله ، يا أبو فلان وحّد الله لدرجة إنو حفظ الأسماء وصار كل ما يمر بنادي عليهم يا أبو فلان يا أبو فلان  :))) انا بلاقيها حلوه كتير بفترة السحور وبنبسطوا عليها الصغار كتير ، راح أفتقد هادا الشي بعمان وخاصة بمنطقتنا ، يمكن  في أماكن معينة بعمان لسا موجود بس قليل .

إيش بالنسبة للولاد اللي بنصاص الليالي بلعبوا …كإنو برمضان إنك اضّل للفجر بالشوارع عادي صار عند الناس !!!

إيش بالنسبة لإنك تاكل على الساعه 2 بالليل وتقول عنه سحــور !!!

“تسحّروا فإن في السحور بركه ” لما قالها المصطفى عليه أفضل الصلاة السلام  كان بقصد الوقت بآخر الليل ما قبل الفجر بقليل هادا هو وقت السحور ، ناس كتير للأسف بضيعوا بركة الوقت هاد والكل بتتحجج بحجج فاضية ، عنا ولاد صغار كيف بدنا نقوم ؟؟ بتلاقيهم بسهروا عالمسلسلات والبرامج وقبل الفجر بحطوا راسهم وبناموا !!!  

إيش بالنسبة للولاد الصغار  بصلاة التراويح اللي بضلوا يبحلقّوا فيك وإنت بتصلي وبمشوا بين الصفوف لأ وبحس مرات إنهم بتركوا حتى الولاد الصغار اللي زييهم وببحلقّوا فييّ  بالذات ههههه كل هالقد وجهي طفولي يعني ؟؟!!! لووووول يعني مرات باجي بدي أضحك بس برجع بركز مشان ما يضيع الخشوع  ….بصراحه بحب أصلي بمسجد ما بعرف فيه ناس يعني  غير المسجد  اللي بحارتنا لإنو كل وقت الدرس وبين الركعات بتيجي عينك بعين جارتك بتقوم لازم تسلم وبتقضي وقتك سلامات وأسئله !!! وغير إنو النسوان وما ادراك ما النسوان ما بحلالهم الحكي إلا بالدرس بين أربع ركعات الله وكيلك !!!! أكتر شي بكرهوا بالدنيا هو الحكي واللت والعجن والغيبة تاعتهم بكرههمممممم….عرفتي شو صار؟ شو طابخين اليوم ؟ ما عرفتي ؟ والله نزلتلك عالسوق و و و ….. كتير بحكوا كتيييييير بوجعولي راسي ، أنا ما بحب الحكي وأصلاتن ما بحكي هادية إجمالا ً كل أجر صيامهم بروح بالغيبة والنميمة ….

السنة هاي إن شا الله آخر سنة راح يدق فيها علينا المسحراتي أول يوم العيد لياخد اللي فيه النصيب ويضّيف ضيافة العيد ….

السنة هاي آخر سنة راح يدقوا علينا ولاد الحارة الصغار مشان قال يعيدوا علينا بس يعني إفهموا جايين نضيّف ملبس ومعمول ههههه

السنة هاي آخر سنة راح أصلي فيها بمسجد شهدت فيه كل سنة عن سنة تطوره وفرحة بناءه ابتداءا من مصلى النساء اللي كان عباره بالأول عن غرفة بتوسع ل 15 شخص ولو إجيت متأخر بترجع للبيت لإنو ما في مكان لحد ما تطور لشادر كبير بحطولنا إياه برمضان بالهواء الطلق بساحة المسجد إلى أن وصل اليوم لطابق كامل للنساء مكيف ومرتب ونظيف ببناءه الجديد ^_^

السنة هاي راح تكون آخر سنة  لكل شي حلو برمضان🙂 إن شا الله يكون الجاي أحلى وأنا متأكده إنو راح يكون بس يمكن بشكل ووجه تاني والله أعلم لإن إحسان الظن بالله شيء مزروع بالقلب دائمـــاً بإذن الله

 السنة هاي راح تكون آخر سنة لكل ذكرى حلوه عشتها بإربد لكــل شبر ركضت فيه وأنا صغيره لعبت فيه كتبت فيه اسمي أو دفّنا فيه أشياء  تحت الأرض …

 أي مكان تعيش فيه طفولتك على وجه الأرض يعز عليك كثيرا  تركه …. اربــــد راح أشتاقلــك كتير كتييير كوميات ولي بإذن الله زيارات كل مدة إن شاء الله تعالى ^_^ والله الموفق والمستعان .

About orangee

Soo simple girl , always spreading smiles around the world :) soo optimistic about her life ;)

Posted on August 9, 2011, in daily events. Bookmark the permalink. Leave a comment.

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: