عن #انكتــاب

مبارح كان معرض انكتاب بالتعاون مع المركز الثقافي العربي على دوار باريس بجبل اللويبده طبعا المعرض ببدا عال4 المســا للساعه تسعه …..المهم طلعت من البيت بكير على أساس أكون من أول الواصلين مشان ألحق أشوف الكتب اللي بدور عليها وصلت أربعه إلا ربع والناس فوق بعض ، طبعا البيع ما كان شغال بس الناس بتتفرج وبتنقى بس على ما أظن ما بلش بالزبط على الأربعه لأ الناس بلشوا يشتروا إلا عشره بهالحدود !!! طبعا عشر دقائق بتفرق كتير والدليل إنو عال5 المسا الكتب شبه خلصت وما ضل عالطاولات إلا الإشي القديم كتير نوعا ما واللي مو ماشي ….إلتقيت بعدد من الناس عرفتهم من  مدوناتهم أو حساباتهم على تويتر لا والمضحك إنو الناس بتعرّف بحالها بالنيك نيم تاعها لووول أنا مثلا تخيلوا معي  : مرحبا أنا أورانجي :))) وفي ناس شفتهم من بعيد بعرفهم من  تويتر بس خجلت بصراحه أسلم عليهم ^_^ اللي بعرفهم من قبل سلمت عليهم ، كان اليوم جميل ورائع إنو تشوف ناس جد هيك مقبله على القراءة بالطريقة هاي ، في ناس سلبيين بردود فعلهم اللي منها : الناس أصلا مش راح تقرأ اللي اشترته ولا بتقرأ بس لإنو الكتب رخيصة مشان هيك مشيت!! جد في ناس بلاقوا بكل فرصة فرصة إنو يكئبوك ويبثوا فيك الأفكار السلبية هاي

!!!

   الإشي الجديد بالموضوع ( بالنسبة إلي يعني ، ما بعرف يمكن يكون في معارض زي هيك ما بعرف عنها أنا ) إنو فكره تبادل الكتب المستعمله فكره كتير حلوه ، كتب مصفوفة عندك عالرف سنين بتبيعهم وبتشتري كتب تانية ، يعني بأسلوب فيد واستفيد ليش لأ  ؟! المعرض كان مقسم إلى طاولات بناءا على السعر وهادا اللي ما عرفتوا أنا إلا متأخر ابتداءا من ربع ليره – نص ليره -دينار وانتهاءا بدينارين ، وأنا بلشت للصدفه من جهة النص ليره ، واكتشفت بعدين إنو جهة الدينارين كتب شبه جديدة وحديثة🙂 على كلن الشغله كلها نصيب وكل واحد أخد نصيبه والكل روح مبسوط ، جد الناس كانت مبسوطه إنها اشترت كتب رخيصة واللي بضحك إنو كل واحد  بطلع على التاني شو ماسك بإيده كتب وسمعت تعليقات بضحك : ييي الكتب خلصوا !! يا الله أخد الكتاب اللي بدي إياه !!  ، وعلى فكره الوضع كان عجقه كتير وما بتوقف عالطاوله  إلا الكل بدز واللي بتفرج من ورا ومن قدام وناقص بس من تحت الطاوله لووول لأ وإذا شفت كتاب عجبك بدك تسبح باتجاه الكتاب هادا عالطاوله لتجيبه لإنو بتعد للعشره بكون مختفي🙂

اقتراحاتي أخيرا ويمكن هي اقتراحات سمعتها من الناس اللي إجت للمرات الجاي يا ريت لو يتم الفرز بناءا على المواضيع وإنو لا البيع ولا حتى الفرجه على الكتب يبلشوا أبكر من الوقت المحدد ويعطيهم ألف عافية على المجهود الرائع🙂 قائمة الكتب اللي طلعت فيها من المعرض :

*. أرز باللبن لشخصين لرحاب بسام ( كنت بدور عليه آخر فتره ) – السعر دينار.

*.Tweets from TAHRIR وهادا الكتاب سمعت عنه بالتلفزيون كتير – السعر نصف دينار.

*.شيء من الفكر لأنيس منصور – السعر ربع دينار

*.الشقيقات لدانيل ستيل – السعر ديناران .

*. andersen’s fairy tales stories – السعر نصف دينار .

*. Tess of the d’Urbervilles – oxford university prints – السعر نصف دينار .

*. pride & prejudice for jane austen – السعر ربع دينار .

*. عودة البنفسجة ل ليلى السايح – السعر دينار .

*. رجل نبيل ل فيكتور هيجو – السعر ربع دينار.

*. عبارة غزل ل فريدة الشوباشي – السعردينار .

*. وأهم كتاب بدور عليه من زمان : سوسروقة خلف الضباب لزهرة عمر – السعر نصف دينار .

About orangee

Soo simple girl , always spreading smiles around the world :) soo optimistic about her life ;)

Posted on June 7, 2012, in daily events. Bookmark the permalink. 8 Comments.

  1. إذا الكتب/الروايات ضاعوا أو اختفوا فاعرفي إنو جزء من الحق علي!

    ما حصلت إلا 2 مع إني وصلت قبل ال4
    !
    هههههه

    قرااااءة سعيدة

    و إن شاء الله يكون فيه معارض قادمة و بتنظيم و تصنيف أفضل🙂

  2. يا الله كله نصيب سبحان الله🙂
    الخيرة فيما اختاره الله
    إن شا الله يردوا ينظموا معرض مره تانية ^_^

  3. أرز باللبن لشخصين كتاب اقترحته صديقة من مصر، واشترته لي من مكتبة الديوان، ممكن يكون الكتاب اللي معك نسختي🙂

    بدي أطلب منك تعبي استمارة التقييم حتى نقدر نحسن المعرض في المرات الجاية:

    https://docs.google.com/spreadsheet/viewform?formkey=dEljRG5hNW5tYkJYSFNVUkhqV2FIbFE6MQ#gid=0

    شكراً كتير لإني اجيتي وعلى النصائح والاقتراحات.

  4. يا سلام يعني النسخه دش من مصر بقى :-))))
    العفو حبيبتي إن شا الله بعبيه :))

  5. مرحبا أورانجي
    كيف الحال؟
    أنا وصلت لدوار باريس بعد الخامسة ، والدنيا كانت زحمة يا دنيا زحمة:) ، بصراحة لم أتوقع أنه يكون هالقد عدد الناس ، ولا ننسى أنه المكان محدود من حيث المساحة ، أصبت بالإحباط لأنه عدد الكتب كان قليل جدا على الطاولات ، وفهمت أن معظمها كان قد طار، وبصعوبة بسبب التزاحم استطعت أن أشاهد بعضا مما تبقى من الكتب ، واشتريت القليل للأسف ، بصراحة لم يكن في بالي أن أجد بعض الكتب التي يستهويني قراءتها ،لسبب بسيط أنه ما لدي من كتب في مكتبتي لا يمكن أبدا ان أتخلى عنه ، لهذا كانت فكرة انكتاب فكرة جيدة أن جعلت هؤلاء الناس يتخلون عن أنانيتهم! كنت أطمع أيضا أن أجد كتبا للأطفال (قصصا للأطفال) لكن للأسف لم أجد:( ربما فاتني ذلك بسبب تأخري بعض الشيء، الخير في الجايات ، وإن شاءالله تتكرر مثل هذه المناسبات، لكن في وقت أبكر أقصد في شهر نيسان أو أوائل أيار مثلا حيث الشوب أقل!
    تحياتي

  6. فعلا ما فكرت فيها إنو التخلي عن الكتاب فعلا شيء صعب جدا🙂 يعني أنا مستحيل أفكر أتخلي عن كتاب عندي ما بعرف !!!وعلى فكرة كان موجود قصص ومجلات للأطفال بس كلها خلصت نعم !!…خلينا نشوفك المرة الجاية ^_^

  7. Haitham Al-Sheeshany

    Hey!
    I have nominated u for the Beautiful Blogger Award.🙂

    U need to:

    – Copy the Beautiful Blogger Award logo and place it in your post,
    – Thank the person who nominated you and link back to their blog,
    – Tell 7 things about yourself,
    – Nominate 7 other bloggers for their own Beautiful Blogger Award, and comment on their blogs to
    let them know.

    http://sheeshany.wordpress.com/2012/09/04/beautiful-blogger-award-me/

  8. والله من يوم ما رحلت ععمان بطلت ألاقي وقت حتى للمدونه😦 إن شا الله قريبا بنعمل هالواجب ^_^ شكرا إلك🙂

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: