(يوميات مغتربة (1

66755_460816743999155_1185202158_n

مع إنو العنوان حسيته مستهلك بس مش خاطر على بالي اشي تاني حاليا يلااااا بمشي الحال المهم المضمون🙂

 …وابتدأت الحكاية —->  (مبينة بداية كلها دراااما )

حكاية بنت سافرت بالطيارة لأول مرة بحياتها ب 9/9 ….الساعة الرابعة عصرا دقت ساعة الصفر ، الساعة اللي كنت من أشهر بفكر فيها وبقول يا ريت ما تيجي : لحظة الوداع …ترررراااا

.

.

SkiP

.

.

المطار الجديد على فكرة حلو ونظيف لهلأ الحمد لله🙂 وأهلك بشوفوا كل خطوة بتعملها مو زي زمان ….في لحظة هيك ما بنساها إجينا أنا وأخوي بدنا خلص نمشي لمكان مش راح نقدر نشوفهم بعدها أصريت أنا لحظتها أضل ألــــوح بإيدي لأهلي مع إنو كتير في عالم وناس مش راح يشوفوا ، ضليتني يمكن دقيقة وأنا بأشر بإيدي عالي لشافوني :))) هيك بتحس إنو من أيام الثمانينات أيام الفيديو كليبات تاعت تلويح الإيدين بين الحبيبة هههههه وركبنا الطيارة وكنت مجهزة حالي إني أكييييد أكيييد راح بعيد عنكم خليني أحكيها بالفصحى ألطف ههههههه يصير عندي غثيان وينتهي بقىء ….. يا سيدي عالمؤدبين اللي بحكوا بالفصحى D: :***

المهم ما صار اللي اتوقعتوا الحمد لله ….طبعا أنا قاعده عالشباك ومبسوطه عالمناظر ( مناظر شو بالزيط ؟؟؟ ما كلها غيوم ههههه ) وإذ بلمح جنبنا على السطر تاعنا شباب اتنين كانوا بشتغلوا معي بمركز الحسين طالعين كمان لبريطانيا سبحان الله قديش الدنيا صغيرة !!! ما صار مجال أسألهم ونحكي وهو أصلا أنا ما بعرفهم شخصي بشوفهم من بعيد كنت ….

أقلعت الطيارة على 5.30 من عمان ووصلنا مطار هيثرو على ال 10.30 بالليل  تقريبا على ماااااااااااا أذكر ….الخطة كانت إنو نطلع بأول طيارة على جلاسجو  ولكن للأسف أول وحده على ال 7.30 الصبح فقلنا  نقضي الوقت سياحة الله وكيلك بالمطار وهون وهون وشوية غفوة بمشي الحال ، أنا لحد وصولنا لمطار هيثرو بلندن وأنا لسه مش مستوعبه إنو أنا ببريطانيا مش عارفة ليش مش حاسة …. في لحظة كمان بضحك ما بنساها لما اطلعنا من الطيارة ومشينا أخوي بقلي استعدي هلأ مش تتفاجأي يلا واحد اتنين تررررررااااااا هههههههههه وإذ احنا بنطلع من باب القادمون وبتعرفوا شو يعني القادمون يعني خلق الله بطلعوا على هالباب بس ناقص يحطولك سبوت لايت هيك يمشي معك ههههه بصراحة يعني استحيت وأنا طالعه كتير  :”)

من ذكريات مطار هيثرو إنو لقينا  زاوية فيها قعدة نوعا ما مريحة ومعزولة شوي بتاخد راحتك فيها ، قعدنا وسولفنا وقعدنا وسولفنا وقعدنا عالنت وشربنا نسكافية وأكلنا وكمان قعدنا وسولفنا ويييه مش راضية تمشي الساعه  !!! المهم أخوي حط راسه ونام شوي عالكراسي وأنا اتمشيت شوي وإذ بتفاجأ إنو في عدد كبير من الناس زينا بالمطار عندهم طيارات كمان ترانزيت نايمين بس الحلو بالموضوع ويييييييين؟ هلأ مش بكون في مطاعم بالمطار وإلها قعدات كنبايات ؟!!! أهووو هدول مجمعينهم وعاملينهم زي التخت لإنو المطاعم أصلا مسكرة ، استغربت من المنظر غريب شوي🙂 بتذكر كمان شب كان مقابلنا قاعد على الأرض وبعزف جيتار كان صوته حلو بلليل لإنو الصدى تاعه عالي وكان معطي هيك جو رومانسي ^_^….

صحيح بكل هالميمـــعه هاي كان رفيقنـــا بلال طلعتوا من الشنته وقعد معنا عالكرسي ( آه كنت مخبيته بالشنته مشان بعدين بس يشوفوه الولاد الصغار بصيروا بدهم يوخدوه وكمان شو بدهم يقولوا عني آآآآآآه طالعه تكمل ماجستير ودبدوبها معها ؟!!!o_O ) ….ما قدرت أنام للأسف وقضيتها للصبح قاعده قرأت شوية قرآن وهيك🙂 الصبح طلعنا بطيارة جلاسجو كانت مريحة كمان نوعا ما بس للأسف لما حجزنا أنا وأخوي ما لقينا كراسي جنب بعض فطلع حظي بين رجلين وأنا بالنص يعني شي ساعتين الطيارة قضيتها زي الخشبة ههههههه ووصــــلنا  مطار جلاسجو أخيرا🙂 اتجهنا على مجموعة شباب وصبايا من جامعتي بستقبلوا الطلاب السنافر اللي مشحتفين زيي لووول وطلعنا بباص الجامعة لنزّلـــنا على بوابة الجامعة الرئيسية  ، اتصـــلنا على هيثم الله يجزيه الخير اللي استلم مفتاح الشقة بفترة غيابنا وشيّك عليها ، طبعا أنا هون قلت لأخوي : يييي هلأ بدك اتغلب الزلمة يجي مشانّـــا إحنا بنروح !!  قلي : لأ مش مشكلة هي مكتبوا هون قريب دقايق وبكون موجود عادي …وفعلا إجى السيد هيثم السريع🙂 استلمنا المفتاح واتجهنا بتكسي للبيت ….

يتبع……

About orangee

Soo simple girl , always spreading smiles around the world :) soo optimistic about her life ;)

Posted on September 28, 2013, in daily events. Bookmark the permalink. 10 Comments.

  1. مبارك مبارك يا قمر
    تروحي و ترجعي بالسلامه يا رب و موفقه في كل خطوه
    المهم لا تغيبي عنا و ضلك خبرينا و طمنينا عنك

    الله يعينك على هيثم :$

  2. مشحتفين = hahahaaaaaaaaaaa

    ahlan wa sahlan ,, wejhkom 5air 3alaina o 3ala glasgow, saif (ejmalan) o l jaw jameel🙂

    b entethar en6eba3atik , 5assa lamma al deraseh (al 7a4ee4iyeah) tebda2

    ———-
    no arabic keyboards + no a3sab for using a website that translates and/or have an arabic keyboard!

    ———–
    whisper = plz e3maleelha block 3an hay l series!

  3. بالتوفيق ♡
    احكيلنا عن كل تفاصيل حياتك انا بحب اعرف

  4. No… This was not what I meant…

    I want to see IMAGES of Scotland😀

    Enjoy your life there… I bet you will never return back🙂

  5. Whisper ,
    الله يبارك فيكي يا رب ويسعدك شكرا ^_^
    بدنا نتحملوا مجبورين شو بدنا نعمل :S

    Haitham ,
    مشحتـــفين بكل معنى الكلمة آه والله الكل فاهم الموظوع إلا احنا هههه🙂
    من يوم ما اجينا والشمس بالسما آه والله مشان تعرفوا بس هداية لما بتفوت على مكان شو بصير فيه المكان ههههههههه :)))
    والله هو صحيح ما بدينا لسه مزبوط بس لهلأ انطباعي إنو انش الله الدراسة ولو كان فيها ضغط من الواجبات اللي بعطونا إياها بس ان شاالله انها أسهل لإنهم بساعدوك بكل اشي ومش حاطين ببالهم إنهم يرسبوك زي عنا بالأردن سبحــان الله ، مرة صاحبتي طالبه ماستر بإحدى الجامعات بدون ذكر أسماء🙂 بتقلي أول يوم اجتهم الدكتورة بتقلهم ما تفكروا إنكم كلكم راح تكملوا للآخر نصكم راح يوصل بس… .نفسيات مريضة آه والله !!!
    بعدين بالنسبة لويسبر إلي معاها حديث على جنـــب إن شاالله ههههههه :))) D:

    الكيل بمكيالين ,
    مش عارفة إذا إنتي أم عمر ولا لأ ؟!! هههههههه
    شكرا إلك حبيبتي ….:)
    ملاحظة : يمكن التفاصيل اللي كتبتها ما بتهم ناس كتير ومفصلة شوي وفي ناس يمكن يلاقوها مملة !!! بس بالنسبة إلي البلوج مثل ال Diary … للمستقـــبل وللذكرى :))

    نوره …
    إن شاالله نور بنزل كتيييييييييير صور بس هالفترة بدي أجيب موبايل جديد بالأول لإنو موبايلي الصور فيه مش واضحة بالمرة ….بعديها راح اقززكم بالصور استني علي شوي ههههههه أصلا التصوير شغلتي D:
    والله كل ما أشوف ناس بقلي لا ترجعي أوعي ترجعي ومش راح ترجعي نفس الشي !!!
    بس بقول الله يسعدها الأردن على كل عيوبها ….الله يسعدها الأردن على كل شي فيها ….100 بلد متل بريطانيا آه والله ما بتعبي عيني متل بلدي… والله بعلم اللي بقلبي🙂 بكفي إنها بلد مسلمة ( بغض النظر عن أديش الناس بطبق الدين ) بس عالأقل وأنا ماشية بالشارع الناس محتشمة شوي وما بخاف وأنا ماشية بالشارع بالليل !!! بتمنى إنو ربنا ما يغريني بالحياة الغربية ويغير رأيي مستقبلا يا رب🙂

  6. ههههههههه
    نيااااااالها الأردن فيكي يا شيخة🙂

    صح… تزكرت… قلتيلي شغلة الموبايل… يللا بنستنى🙂

    لكان مابدي اقلك مش رح ترجعي، بس خليني اقلك ما رح ترجعي وانتي نفس الانسانة اللي راحت… رح ترجعي حاملة معك صفات كتييييير جديدة وتاركة وراكي كتير شغلات… مممم… بلكي حملتي معاكي “بذور التغيير”🙂 تغيير ايجابي طبعاً

  7. بالله عليكي قلتلك ؟!!! آآآه يمكن سألتيني على صور ما صور مشان هيك قلتلك هههههههههههه والله طلعت بحكي كتير أناO_o
    إن شالله أكيد الواحد بالغربة بتغير كتير بس بتعرفي كان لازم أصور فيديو قبل ويعد عن حالي ههههههه والله فكرة حلوة !!! يا خسارة ….

  8. lol
    3ajbatni hai…
    before and after😀

  9. el7amdila 3al salameh ya rab winshalah you’ll enjoy ur new university! good luck:)

  10. الله يسلمك شكرا إلك :))

Any idea ?! ^_^

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: