Category Archives: مشــاهدات من جلاسجو

مشاهــدات من جلاسجو -2

صاحب الظل الطويل

السلام عليكم ورحمة الله وبركاته 🙂

أولا بالنسبة لموضوع المصلى والحمد لله للآن ما حصل شيء جديد لسه ما بلشت أطبع الأوراق وأجهز التعليقات الأورانجية  للآن ولكـــن إن شاء الله قريبا 🙂 ولكن هديك المرة وأنا قاعدة عم بصلي اللي جنبي لما جلست للتشهد صارت تخبط بإيديها لفوق وتحت ترفعهم وتنزلهم بطريقة سريعه أنا كنت شوي بدي أقطع صلاتي فكرتها مريضة أوشي فلما رجعت عالبيت بحكي لأخوي بقلي : هاي من الشيعه هيك بيعملوا O_o ما علينـــا شكلي فعلا راح أشوف غرايب وعجايب هون …..لا حول ولا قوة لا بالله العلي العظيم….

صـــاير عندي حنين مفاجىء لجودي أبوت مش عارفة متى بلش هالموضوع أو كيف ؟!!

إلي فترة قاعدة عم بحضر عاليوتيوب حلقات جودي أبوت بالترتيب وعم أحس إنها بتشبهني ( أو أنا بشبهها هههه ) الهبـــل على الطيبة على حماسها ونشاطها لأي موضوع ، على مكتبها ، على غرفتها اللي بتشبه غرفتي كتير لدرحة إنو هاي الصورة فوق هي صورة صاحب الظل الطويل (جون سميث بالمسلسل)  اتغلبت للقيتها بالنت وطبعتها وعلقتها جنبي عالحيط زي ما هي عاملة بالزبط :))))) هههههههه وكنت بفكر أكتب رسائل كمان بس ما عرفت على مين أبعتهم ؟!! بفكر أبعتهم على عنوان شي أمير بريطاني ومش مشكلة لو ما قرأهم عالأقل هيك بضلني مفكرة إنو بقرأهم لوقت لأتخرج  لوووول :)) وشو بعرفكم إنتو آآآآه ؟!!!!!! بلكن عنجد تصير القصة ويكون بقرألي ؟!! بعديها بتجوزوا وبرجعش عالأردن ( قال إنو يعني حلمي ما أرجعش عالأردن ) وبيجي على تخريجي إن شاء الله وبقلي : هدايــــة ؟!! أنا كنت بقرألك دائما ^_^ وبتصير بعدين قصة بجميع أنحاء العالم وبتطلع على البي بي سي حتى و ……. خـــــلص أظن بكفي لهون مش راح أقلكم شي بصير معي ومع الأمير بعدين بتعرفوا عالبي بي سي نشرة الساعة 8 متل هالوقت بالزبط السنة الجاي !!!!  ههههههههه  🙂

ما في صور كتير للآن لإنو ما جبت موبايل جديد هاليومين  ان شاء الله والله غير أقززكم صور  موبايلي بصور بس ما بحس الصور واضحين كتير :)))

هادا القط اسمه “ميـــلر” قط كلبوز بجنن بتلاقيه بتمشي بالجامعه وإلو كلية معينة بقعد فيها أغلب الأحيان بالبرد دور عالتدفئة بكون قاعد عندها ، وبفوت عمكاتب الدكاترة سيّاح نيّاح مش عارفة كيف انوجد هون ولا قصته ولكن القطط لا تتواجد في الشوراع هون زي بالأردن فهو شيء غريب هون والطلاب اللي رايحين وجايين بتصوروا معاه وبلعبوه لإنو معروف بالجامعه كتير  يتواجد بالكلية تاعته وين ما كان وبفوت وبطلع عالمحاضرات باشا ولا حدا بحكي معاه وإلو صفحة عالفيس بوك كمان بحطولوه الطلاب صور وبتفقدوه كل فترة وين هو الآن  🙂

26005_376024894312_6000452_n

 صور متفرقة من تجارب الطبخات اللي جربتها على أخوي بالشهر ونص الماضي والحمد لله لساته عايش لهلأ ههههههههه

191020131428 270920131383 280920131397

آخر صورة هاي ســــر 🙂 اذا طلع الرز مخبص قولي أنا خصووووصي عملته مخبص مشان اقدر أرصّوا بالزبدية ويطلع على شكل الزبدية لإنو لو مو مخبص ما بزبط 😉 P; …..ههههههههههههه حوااااا والأجر على الله :))))

مشاهدات من جلاسجو -1

ستكون سلسلة  “مشاهدات من جلاسجو ” ان شالله هي عنوان لمشاهدات غريبة و شيقة نوعا ما حدثت لي شخصيا أو شاهدتها أو سمعتها ، أشاركها معكم لطرح فكر و رأي معين أمامكم …

اليوم حصــل أمامي موقف غريب نوعا ما من خلاله انبثقت فكرة السلسلة هذه …

كنت قد انتهيت من صلاة العصر في مصلى الجامعة في مبنى المكتبة وأنا قاعده بأمان الله دخلت وحدة لابسة جينز وبلوزة ضيقين مش محجبة ، المهم طالت قطعة قماش من الشنته مثلثة الشكل  وحطتها على راسها وبدأت تصلي !!! أنا استغربت سبحان الله !!!  اذا مشيت من جنب هالبني آدمة ولا يمكن تقول إنها مسلمة …طريقة اشاربها قطعه صغيرة يا دوب 🙂

طبعا بلشت السوسة فيي لازم انكشها هالبني آدمه :))  صلت 4 ركعات وسلمّت قلت ها فرصة هلأ بتعرف عليها ….قامت تصلي فورا قلت يمكن بدها تصلي ركعتين ؟!! كملت قامت عالثالثه …طبعا أنا ما قدرت أستناها ولا دقيقة زيادة لإنو متأخرة عالبنات أصلا و بستنوا فيي بالبرد بره !!!

وأنا طالعه بمشي مشيت مشي بطىء  وأنا بقول بحالي هلأ يمكن بتطلع بتمشي وبلاقيها صدفة بالممر  وراي… أبداااا ما حصل !!! …..كتير اتمنيت اتعرف عليها …اتمنيت انو أحكيلها انو احنا موجودين عنا تجمع طلاب مسلمين بتقدري تنضمي …..حسيتها مسلمة جديد من طريقة كل شي فيها  وشكلها !! دعيت ربي من قلبي انو اصدفها مرة تانية ويكون في فرصة اعرف أكتر عنها ….الله أعلم قد ييسر الله  لها أشياء وأمور تعينها اذا كانت في بداية مشوارها وبتمنى تكون عن طريقي يا رب 🙂

هلأ أكيد مش كل ما الواحد شاف وحده مسلمة بدو يتعرف وهيكا ^_^ بس هاي كان عندي شعور بقلبي انو بحاجة لحدا وأنا قلبي دليلي قلي ح تحبي هههههههههه  :)))))لا بمزح ^_^ بس  قلبي عنجد دليلي دائما بأشياء كتيرة بحياتي سبحان الله !!