Category Archives: daily events

(يوميات مغتربة (1

66755_460816743999155_1185202158_n

مع إنو العنوان حسيته مستهلك بس مش خاطر على بالي اشي تاني حاليا يلااااا بمشي الحال المهم المضمون 🙂

 …وابتدأت الحكاية —->  (مبينة بداية كلها دراااما )

حكاية بنت سافرت بالطيارة لأول مرة بحياتها ب 9/9 ….الساعة الرابعة عصرا دقت ساعة الصفر ، الساعة اللي كنت من أشهر بفكر فيها وبقول يا ريت ما تيجي : لحظة الوداع …ترررراااا

.

.

SkiP

.

.

المطار الجديد على فكرة حلو ونظيف لهلأ الحمد لله 🙂 وأهلك بشوفوا كل خطوة بتعملها مو زي زمان ….في لحظة هيك ما بنساها إجينا أنا وأخوي بدنا خلص نمشي لمكان مش راح نقدر نشوفهم بعدها أصريت أنا لحظتها أضل ألــــوح بإيدي لأهلي مع إنو كتير في عالم وناس مش راح يشوفوا ، ضليتني يمكن دقيقة وأنا بأشر بإيدي عالي لشافوني :))) هيك بتحس إنو من أيام الثمانينات أيام الفيديو كليبات تاعت تلويح الإيدين بين الحبيبة هههههه وركبنا الطيارة وكنت مجهزة حالي إني أكييييد أكيييد راح بعيد عنكم خليني أحكيها بالفصحى ألطف ههههههه يصير عندي غثيان وينتهي بقىء ….. يا سيدي عالمؤدبين اللي بحكوا بالفصحى D: :***

المهم ما صار اللي اتوقعتوا الحمد لله ….طبعا أنا قاعده عالشباك ومبسوطه عالمناظر ( مناظر شو بالزيط ؟؟؟ ما كلها غيوم ههههه ) وإذ بلمح جنبنا على السطر تاعنا شباب اتنين كانوا بشتغلوا معي بمركز الحسين طالعين كمان لبريطانيا سبحان الله قديش الدنيا صغيرة !!! ما صار مجال أسألهم ونحكي وهو أصلا أنا ما بعرفهم شخصي بشوفهم من بعيد كنت ….

أقلعت الطيارة على 5.30 من عمان ووصلنا مطار هيثرو على ال 10.30 بالليل  تقريبا على ماااااااااااا أذكر ….الخطة كانت إنو نطلع بأول طيارة على جلاسجو  ولكن للأسف أول وحده على ال 7.30 الصبح فقلنا  نقضي الوقت سياحة الله وكيلك بالمطار وهون وهون وشوية غفوة بمشي الحال ، أنا لحد وصولنا لمطار هيثرو بلندن وأنا لسه مش مستوعبه إنو أنا ببريطانيا مش عارفة ليش مش حاسة …. في لحظة كمان بضحك ما بنساها لما اطلعنا من الطيارة ومشينا أخوي بقلي استعدي هلأ مش تتفاجأي يلا واحد اتنين تررررررااااااا هههههههههه وإذ احنا بنطلع من باب القادمون وبتعرفوا شو يعني القادمون يعني خلق الله بطلعوا على هالباب بس ناقص يحطولك سبوت لايت هيك يمشي معك ههههه بصراحة يعني استحيت وأنا طالعه كتير  :”)

من ذكريات مطار هيثرو إنو لقينا  زاوية فيها قعدة نوعا ما مريحة ومعزولة شوي بتاخد راحتك فيها ، قعدنا وسولفنا وقعدنا وسولفنا وقعدنا عالنت وشربنا نسكافية وأكلنا وكمان قعدنا وسولفنا ويييه مش راضية تمشي الساعه  !!! المهم أخوي حط راسه ونام شوي عالكراسي وأنا اتمشيت شوي وإذ بتفاجأ إنو في عدد كبير من الناس زينا بالمطار عندهم طيارات كمان ترانزيت نايمين بس الحلو بالموضوع ويييييييين؟ هلأ مش بكون في مطاعم بالمطار وإلها قعدات كنبايات ؟!!! أهووو هدول مجمعينهم وعاملينهم زي التخت لإنو المطاعم أصلا مسكرة ، استغربت من المنظر غريب شوي 🙂 بتذكر كمان شب كان مقابلنا قاعد على الأرض وبعزف جيتار كان صوته حلو بلليل لإنو الصدى تاعه عالي وكان معطي هيك جو رومانسي ^_^….

صحيح بكل هالميمـــعه هاي كان رفيقنـــا بلال طلعتوا من الشنته وقعد معنا عالكرسي ( آه كنت مخبيته بالشنته مشان بعدين بس يشوفوه الولاد الصغار بصيروا بدهم يوخدوه وكمان شو بدهم يقولوا عني آآآآآآه طالعه تكمل ماجستير ودبدوبها معها ؟!!! o_O ) ….ما قدرت أنام للأسف وقضيتها للصبح قاعده قرأت شوية قرآن وهيك 🙂 الصبح طلعنا بطيارة جلاسجو كانت مريحة كمان نوعا ما بس للأسف لما حجزنا أنا وأخوي ما لقينا كراسي جنب بعض فطلع حظي بين رجلين وأنا بالنص يعني شي ساعتين الطيارة قضيتها زي الخشبة ههههههه ووصــــلنا  مطار جلاسجو أخيرا 🙂 اتجهنا على مجموعة شباب وصبايا من جامعتي بستقبلوا الطلاب السنافر اللي مشحتفين زيي لووول وطلعنا بباص الجامعة لنزّلـــنا على بوابة الجامعة الرئيسية  ، اتصـــلنا على هيثم الله يجزيه الخير اللي استلم مفتاح الشقة بفترة غيابنا وشيّك عليها ، طبعا أنا هون قلت لأخوي : يييي هلأ بدك اتغلب الزلمة يجي مشانّـــا إحنا بنروح !!  قلي : لأ مش مشكلة هي مكتبوا هون قريب دقايق وبكون موجود عادي …وفعلا إجى السيد هيثم السريع 🙂 استلمنا المفتاح واتجهنا بتكسي للبيت ….

يتبع……

Advertisements

اشتقتــلك

 اشتقت للكتابة بمدونتي ….اشتقت للحياة ….اشتقت احس حالي ليـــدي …اشتقت أنام مع الناس بالليل واصحى بالنهار…اشتقت أروح وآجي بدون ما يكون عندي هم الدوام….اشتقت أنزل عالسوق أشتري أواعي بنفس مقبلة عالحياة ومفرفشه … اشتقت أدور على وصفات طبخ وأجربها …اشتقت أتابع صيحات الموضة بالشعر والمكياج زي زمان …اشتقت لحالي قبل سنة ونص ….يا أنـــا راجعه بإذن الله راجعه  خلص بكفي !!

ومـــا الحلم إن لم يكن بعينيكـــي وردي

0d364d4a64f205

مضى على رحيلنـــا من اربد الى عمان ما يقارب السنة والنصف ، لا أدري كيف ومتى مضت أيامهم !! أقف الآن في هذا اليوم الذي أكملت فيه سن السابعه والعشرين أمامكم 🙂 …..سبع وعشرون عاما مضت على هذه الدنيا محتضنة أجمل وأبسط وأرق فتـــاة وأكثر مخلوق شفاف على وجه البسيطه ……مغرورة ؟!! قد أكون …وكيف لا أكون وأنـــا اسمي ” هـــدايـــــه ” و هويتي : مسلمـــة وأتمنى من الله أن يكتبني  من المؤمنين يا رب!!  يجب على المرء أن يقدر ذاته ليمنحها الثقة لتمضي قويةً في هذه الحياة!!

في السنة والنصف التي مضت  من حياتي في عمان تغيرت أشياء كثيره !!! على الصعيد الشخصي أصبحت أكثر انشغالا من ذي قبل ، أحاول أن أملأ حياتي بالأعمال المفيدة وأتمنى أن أوسع نطاق اهتماماتي وهواياتي لتشمل الأعمال التطوعيه أكثر بإذن الله تعالى !! ألوم نفسي كثيرا كيف مضت حياتي بعد الجامعة للآن بدون أي انجازات تطوعية أو نشاطات شبابية أو أي مساهمة مني لمجتمعي !!  أصبحت أكثر نضوجا من ذي قبل ولكـــن نضوجي هذا لن يمنعني من أن أعيش حياتي بروح مرحه طفولية في أحيان كثيره ، لم تكن عمـــان بالنسبة لي يوما  الشيء الغريب فقد كنت منذ الطفولة الرّحالة الصغير ما بين اربد وعمــان ولكن الذي اختلف في حياتي اليوم هو أنني أنام وأصحو كل يوم وأنا في عمـــان 🙂 !!

 سنـــة 2013 بالنسبة لي ابتدأت بداية غريبة ولكنها بداية ليست ككل بدايات حياتي بداية سعيدة جميلة وردية …. لأول مرة في حياتي أختبر بداية كبدايتها ، بداية حملت في طياتها عزيمة وهمة عالية ووعود وآمال قوية وأحلام جديدة ، مختلفة هي عندي عن ذي قبل !!

في الماضي كــــنت دوما الشخص الذي يعـــرف ماذا يقرر ويتخذ القرار المناسب ولو صادفني شيء من الحيرة والتردد كنت ألجـــأ لوالدي وأثق في قراره وآخذ به ولو لم تكن عندي قناعة بقراره  !!!امـــا اليوم ها أنا أقف في حيره وعلى مفترق طرق كلاهما رائع ، حيرة لنفسي فقط لا أستطيع أن استشير فيها أحد إلا إثنـــان قلبي وعقلي!!  ولكن للأسف فكلاهما اختار طريقا مختلفا تماما عن الآخر هذه المرة  !! لا أدري !!! أخاف أن تكون نهاية إحدى الطريقين ســـراب … ووهم !! وأخاف أن يكون كلاهما حقيقة وأنا لا أعرف ذلك أاستطيع أن أسلكهما معا ؟!! أخاف أني نسجت من الخيال أوهام وبأن يكون كلا الطريقين أصلا خيال !! أيحدث أن تظهر في حياتك أمور خارجة عن ارادتك؟ خارجة عن التوقعات وعن التنبؤات بدون أي مقدمات لم تحسب لها حساب ولم يخطر ببالك أنها قد تحدث لك أنت يوما ما لأنك ببساطة تعتقد بأن هذه الأشياء تحدث لغيرك تماما ؟!! أيحدث بالعادة أن تأتي الأمور مجتمعة معا أولا تأتي أبدا ؟؟ كانت تمر عليك كل تلك السنون وأنت تنتظرها ولكنها تفاجئك دفعة واحدة وتكـــاد ان تصاب بسكتة قلبية لأن قلبك ببســـاطه يؤلمك من كثرة التفكير؟!!

  الكثير من الأسئلة في البال ولكن لا إجابه سوى احساس وشعور بالقلب يعتريني ويقول لي ، اتركي القرار للذي خلقك هو سيجيب ، هو الله جل علاه يحبني وأنا على يقين بأنه سيختار لي الأفضل والخير بالتأكيد  كما كان دوما لي في حياتي 🙂 سأكون سعيدة باختياره وتقديره ،  لا أملك في يدي سوى صلاة الإستخارة والدعاء وسأترك الرياح تمشي بمركبي وسط البحار وترسو بي في شط الأمـــان .

من الأمور التي سأجدد فيها النية وأتمسك بها هذه السنة كما تمسكت بها على مدار سنوات حياتي هي أن أحافظ  على مشاعري وعواطفي من الإستنزاف !! سأتمسك بمبدأي وثوابتي على أن يكون أول كل شيء في حياتي مع الشخص المناسب ، أنا من تلك الفتيات التي تحب أن تسّطر في حياتها وتنقش التواريخ والأحداث وأوائـــل الحواديت : أول لقاء ، أول سلام …أول…أول ….أول ، فتكون صدق المشاعر وحلاوتها مع الشخص المناسب أجمل وأرقى  وأصدق !!! سأكون صادقة تماما عندما أجيب وأقول : أنت الأول !!

يستحضرني هنا وأنا اتحدث عن حبي لتدوين واستذكار  أوائل الأحداث في كل شيء أنني  كنت قد زرت في السنة الماضية معرض للكتب مع أخي الكبير وشدني في المعرض كتابان كبيران أحدهما للبنات والآخر للأولاد !! ما شدني للكتابان هو العنوان :” مذكرات طفولتي السنة الأولى في حياة طفلي ” عندما تصفحته وجدته يحتوي على صفحات تدون أول كل حدث في حياة الطفل كل شيء يخطر ببالك من أول صفحة للصق صورة للطفل بعنوان  ” هـــا أنا داخل بطن أمي ”   إلى صفحات   ” ما هي أجمل ليلة قضاها الطفل ” …” أول حمام لي ” …” قصتي المفضلة ”  ” تفاصيل يوم الاحتفال بقدومي”…..تخيل كل شيء مدون ومسجل ومصور في كتاب ما أروعها من هدية يحملها ابنك معه في حياته  🙂

 أتمنى في هذه السنة من الله عز وجل أن يوفقني لطاعته أولا ويعينني لمتابعة حفظ كتابه تعالى وبأن يختار لي كل ما هو خير لي وييسر الأمور كيفما يشاء يا رب ….:)

على الهامش :)) أحب خاطرة للكاتبه  نهى جادو أحس فيها أنها تخاطبني كثيرا تقول فيها  :

و ما الحُلم إذن إن لم يكُـن بعينيكِ وردي

هل داعبك الفُضول أن تلمسيه بأناملك المخملية … ؟

الأحلام ياأميرة اللحظة المسروقة لم يُخلق إلا للساذجات

الساذجات أمثـال شَغفك بحياة بين النجوم

و أرجوحة ياسمين على جذع الهـلال !

عودي من حيثُما جئتي

آخر طرف وجودك صفحة تلك القصة …

نُهدهد بها جفن طفل غائب تحت تأثير السُلطان …

لربما هـَـداكي في النهاية بقشيش وقال ” يا حرام مسكينة ” !

2012 in review

WaaaaW WordPress has just sent me my annual report for da blog Love it 🙂 

62582_147381735299034_132290533474821_209756_4252307_n

Here’s an excerpt:

600 people reached the top of Mt. Everest in 2012. This blog got about 2,300 views in 2012. If every person who reached the top of Mt. Everest viewed this blog, it would have taken 4 years to get that many views.

Thanx for you all for reading and commenting 😉

Click here to see the complete report.

خواطر أورانجيه

 

مبارح كنت أقرأ موضوع لصديقتي العزيزه ويسبر أثــار في داخلي حقيقة عدة تساؤلات وخلجــات داخليه زمان ما سئلتها لنفسي أو ناقشتها حتى ….ولكن موضوعها طرح في ذهني سؤال : طيب إنتي شو رأيك ؟! غيرتي رأيك ولا لسه تفكيرك كما كان عليه في بداية العشرينات ؟!

ما حبيت أعلق على موضوعها لإنو ردي راح يكون طويل فقلت أطرحه ك بوست أناقش فيه الفكره  واللي هي حسب ما فهمتها :

هل يتزوج الشاب لو كان مو قادر ماديا 100% ؟! وما هو الحد الأدنى لمتطلبات الزواج  اللي لازم يكون مأمنها ؟

Read the rest of this entry

هل وجدت نفسك يومــاً تستيقظ صباحاً وتقرر أنا اليوم سأكون حزينا

سأرسم الحزن وألونه بالأسود والأسود

سأختــار أن لا أضحك لا أتكلم فقــط اجلس وحيدة منعزله وأحزن

لا من شيء ولا لشيء سوى أن هو شعور غريب ينتابني أحيانا

لأعود في صباح اليوم التالي وأقرر أن لاحزن اليوم

يكون الحزن قراراً في بعض الأحيان

 

عن #انكتــاب

مبارح كان معرض انكتاب بالتعاون مع المركز الثقافي العربي على دوار باريس بجبل اللويبده طبعا المعرض ببدا عال4 المســا للساعه تسعه …..المهم طلعت من البيت بكير على أساس أكون من أول الواصلين مشان ألحق أشوف الكتب اللي بدور عليها وصلت أربعه إلا ربع والناس فوق بعض ، طبعا البيع ما كان شغال بس الناس بتتفرج وبتنقى بس على ما أظن ما بلش بالزبط على الأربعه لأ الناس بلشوا يشتروا إلا عشره بهالحدود !!! طبعا عشر دقائق بتفرق كتير والدليل إنو عال5 المسا الكتب شبه خلصت وما ضل عالطاولات إلا الإشي القديم كتير نوعا ما واللي مو ماشي ….إلتقيت بعدد من الناس عرفتهم من  مدوناتهم أو حساباتهم على تويتر لا والمضحك إنو الناس بتعرّف بحالها بالنيك نيم تاعها لووول أنا مثلا تخيلوا معي  : مرحبا أنا أورانجي :))) وفي ناس شفتهم من بعيد بعرفهم من  تويتر بس خجلت بصراحه أسلم عليهم ^_^ اللي بعرفهم من قبل سلمت عليهم ، كان اليوم جميل ورائع إنو تشوف ناس جد هيك مقبله على القراءة بالطريقة هاي ، في ناس سلبيين بردود فعلهم اللي منها : الناس أصلا مش راح تقرأ اللي اشترته ولا بتقرأ بس لإنو الكتب رخيصة مشان هيك مشيت!! جد في ناس بلاقوا بكل فرصة فرصة إنو يكئبوك ويبثوا فيك الأفكار السلبية هاي

Read the rest of this entry

بوست الصور :-)

حضرة أخينا بالله كنوش بتشمس عالبرنده وبنادي عليه ولا حدا هون كان عم بسمع لغراب مار بالصدفه

Read the rest of this entry

عنجـــد أنا هيك بالفتره هاي !!!! صعبه جدا علي  والقرار إن شا الله يكون مناسب وصحيح ادعولــــي ربنا يوفقني

أشيــاء تغيرت كتير

بآخر أكمن شهر تغيرت بحياتي أمور كتيره !!!

ومش بس الأشياء تغيرت من حواليّ لأ …..أنا تغيرت كمــان !!! غريب!!!

هل المعلومة اللي مره سمعتها زمان إنو طبع الإنسان يتغير كل سبع سنوات صحيحه ؟!! يمكن …

بتذكــر إشي غريب صار معي من شي شهر !! كنت  نازلة عالسوق مره لحالي ولما   قربت من بيتنا وأنا بسوق وبلف بالسياره على تقاطع ، فجأة وبدون مقدمات إجاني إلهام او تصور إنو بعض الأشياء الموجوده عندي بالغرفه طفولية وإنو أنا كيف بيوم من الأيام كنت صامدتها عندي عالطاولة ما بعرف !! هاي الملاحظة  اللي خطرت ببالي ما عمري فكرت  فيها من قبل!!! بس بتذكر إنو لما دخلت عالبيت أول شي عملتو هو التخلص منها فورا ….التفسير الوحيد اللي طلع معي إنو هادا يمكن جزء من مرحلة النضوج!!! إتك تشوف الأشياء بمنظور آخر او حتى تستسخف أمور عملتها بحياتك!!

  هلأ  أنا ما بحكي إني أنـــا أصبحت انسانه ناضجه 100% لكـــن أؤومن كما هو معروف بأن النضوج تدريجي وما بيجي من خبطه عالراس  يعني أكيد مش لحظي !!!

مدونتي مثلا او حتى أي مدونة لأي شخص هي خير شاهد على نضوج الإنسان بحياته ، المواضيع التي تكتب في كل فتره من حياة الإنسان على مدونته تختلف سواء في الطريقة التي نكتب فيها أو حتى المواضيع التي تشد اهتمامنا ونغطيها بكتاباتنا  فلو رجعت انت نفسك وقرأت شو كنت تكتب من سنين راح تضحك على المواضيع اللي كنت تكتبها 🙂

بنرجع وبنقول الأنسان بتغيّر والحياة بتتغير وما إشي بضل على حاله الصغير بكبر والكبير بعقل….أشياء كتير بحياتي راح تتغير الله أعلم لو كان فيها خير فربنا ييسرها إلي ولو كان فيها شر الله يبعدها عني ….وكل حديث بوقته حلو وليجي الصبي بنصلي عالنبي :-)هههه وللي بالهم بروح لبعيد اطمنوا ما في شي مناسبه بالأرجــــاء لأ  ^_^